திருத்தணியில் வடமாநில இளைஞர் தாக்கப்பட்ட சம்பவம்: காவல் துறை விளக்கம்

திருத்தணியில் ஒடிஸா இளைஞர் மீதான தாக்குதல் சம்பவம், அவர் வடமாநிலத்தவர் என்பதற்காக நிகழ்ந்தது அல்ல என்று தமிழக காவல் துறையின் வடக்கு மண்டல ஐஜி அஸ்ரா கர்க் தெரிவித்தார்.

- 

இது தொடர்பாக சென்னை ஆலந்தூரில் செய்தியாளர்களுக்கு அவர் செவ்வாய்க்கிழமை அளித்த பேட்டி: திருவள்ளூர் மாவட்டம், திருத்தணியில் கடந்த 27-ஆம் தேதி ஒடிஸா மாநிலத்தைச் சேர்ந்த 20 வயது இளைஞர் தாக்கப்பட்டது துரதிருஷ்டவசமானது. அவர் சென்னையில் இருந்து திருத்தணி செல்லும் ரயிலில் பயணம் செய்தபோது, திருத்தணியைச் சேர்ந்த இரு சிறுவர்கள், அவர்களது கூட்டாளிகளான அரக்கோணத்தைச் சேர்ந்த இரு சிறுவர்கள் (அனைவருக்கும் வயது 17) ஆகியோருடன் தகராறு ஏற்பட்டது. இந்த நான்கு சிறுவர்களும் ஒடிஸா இளைஞரைத் தாக்கினர். மேலும், அவரை மிரட்டி கட்டாயப்படுத்தி ரயிலில் இருந்து திருத்தணியில் கீழே இறக்கி, ஒரு மறைவான இடத்துக்கு அழைத்துச் சென்று இரு பட்டாக்கத்தியால் நான்கு பேரும் தாக்கியுள்ளனர். அவர்கள் தாக்கும்போதே விடியோ எடுத்து, அதை சமூக ஊடகங்களில் பதிவிட்டுள்ளனர். பாதிக்கப்பட்ட இளைஞர் வேலைக்காக வரவில்லை; சுற்றிப் பார்க்கும் நோக்கத்துடன் தமிழகத்துக்கு வந்துள்ளார்.