போரை நிறுத்தவிட்டால் கரும் வரி விதிப்பு

ஐ.நா. சபையில் ரஷியாவுக்கு டிரம்ப் எச்சரிக்கை

- 

உக்ரைன் உடனான போரை முடிவுக்குக் கொண்டுவர ரஷியா முன்வராவிட்டால், அந்நாடு மீது மிக வலுவான முறையில் வரிகளை விதிக்க அமெரிக்கா முழுமையாகத் தயாராக உள்ளது என்று ஐ.நா. பொதுச் சபை கூட்டத்தில் அமெரிக்க அதிபர் டொனால்ட் டிரம்ப் செவ்வாய்க்கிழமை எச்சரிக்கை விடுத்தார்.

உக்ரைன்-ரஷியா இடையிலான போர் மூன்று ஆண்டுகளுக்கும் மேலாக நீடித்து வருகிறது. இந்தப் போரை முடிவுக்குக் கொண்டுவர, அமெரிக்க அதிபர் டிரம்ப் முயற்சி செய்து வருகிறார். இதுதொடர்பாக ரஷிய அதிபர் விளாதிமீர் புதின், உக்ரைன் அதிபர் வொலொதிமீர் ஸெலென்ஸ்கியுடன் டிரம்ப் பேச்சுவார்த்தை நடத்தியபோதிலும், போரை முடிவுக்குக் கொண்டுவருவதில் எந்த முன்னேற்றமும் ஏற்படவில்லை.

இந்நிலையில், அமெரிக்காவின் நியூயார்க் நகரில் ஐ.நா. பொதுச் சபையின் 80-ஆவது அமர்வு பொது விவாதம் செவ்வாய்க்கிழமை தொடங்கியது. இதில் அமெரிக்க அதிபராக 2-ஆவது முறை பதவியேற்ற பின்னர், டிரம்ப் முதல்முறையாக உரையாற்றினார்.

அவர் பேசியதாவது: உக்ரைன் உடனான போரை முடிவுக்குக் கொண்டுவர ரஷியா முன்வராவிட்டால், அந்நாடு மீது மிக வலுவான முறையில் வரிகளை விதிக்க அமெரிக்கா முழுமையாகத் தயாராக உள்ளது. இந்த நடவடிக்கை போர் மூலம் ரத்தம் சிந்தப்படுவதை நிறுத்தும்.