சமநிலை சமுதாயம் உருவாக வேண்டும்

சமரசம் உலவும் இடமான சுடுகாட்டிலும் தீண்டாமைக் கொடுமை தீர்ந்தபாடில்லை. கலப்புத் திருமணத்தை இந்த சமூகம் வரவேற்றிருக்குமா என்ன? ஆனால், அதற்கும் காந்தியடிகளின் தீண்டாமை ஒழிப்பு இயக்கம் பெரிதும் முயன்றிருக்கிறது.

- அருணன் கபிலன்

நீண்டாமை ஒரு பாவச்செயல், தீண்டாமை ஒரு பெருங்குற்றம், தீண்டாமை மனிதநேயமற்ற செயல் என்று பாடப்புத்தகங்களில் முதலில் கற்க வேண்டியது இதைத்தான் என்பதாக அச்சிட்டுத் தருகிறோம். ஆனால், நம் மனதில் தான் பதிவதாகத் தெரியவில்லை. இந்திய விடுதலைக்குப் பின்னர் இத்தனை ஆண்டுகள் ஆகியும் இன்னும் ஒழியாமல் இருக்கிற இந்தக் கொடுமையை என்னென்பது? இந்திய விடுதலைப் போராட்டம் வெள்ளையர்களிடமிருந்து வேண்டிய நிர்வாக உரிமையாக மட்டுமில்லை; சொந்த மண்ணிலேயே பலகாலமாகத் தீண்டாமைக் கொடுமைக்கு உள்ளாக்கப்பட்ட மக்களின் சமூக விடுதலையையும் உள்ளடக்கியதுதான். இதனை நமக்குச் சரியாகப் புரியச் செய்தவர் மகாத்மா காந்தி. தன் வாழ்நாள் முழுவதும் தீண்டாமைக்கு எதிராக அவர் போராடினார்.

அடிமைத்தன்மையினும் பேரவலமானது தீண்டாமை. வெள்ளையர்களிடம் அடிமைப்பட்ட பின்னரே பலருக்கு அடிமை வாழ்வின் கொடுமை சுட்டது. ஆனால், தீண்டாமையைப் பற்றி அவர்கள் அறிந்திருப்பார்களா என்பது ஐயம் தான். அதனை அழுத்தமாக இந்தச் சமூகத்தின் மனத்திலே பதிய வைத்தவர் மகாத்மா காந்தி. பட்டிதர் ஆசிரமத்திலுள்ள நண்பர் ஒருவர் நாஹரி பரீக்குக்கு எழுதியுள்ள கடிதத்தில் 'இந்தியாவில் அரசியல் அரங்கத்துக்கு மகாத்மா காந்தி விஜயம் செய்தது முதல் தீண்டாமை விலக்கு இயக்கம் அதிக வளர்ச்சி அடைந்திருக்கிறது' என்று பதிவு செய்திருக்கிறார்.