2 வாக்காளர் அட்டைகளை தேஜஸ்வி வைத்திருந்தது குற்றம்

இரண்டு வாக்காளர் அடையாள அட்டைகளை வைத்திருந்ததன் மூலம் பிகார் மாநில சட்டப் பேரவை எதிர்க்கட்சித் தலைவரும் ராஷ்ட்ரீய ஜனதா தளம் தலைவருமான தேஜஸ்வி யாதவ் குற்றச் செயலைப் புரிந்துள்ளார் என்று பாஜக தரப்பில் ஞாயிற்றுக்கிழமை குற்றஞ்சாட்டப்பட்டது.

- 

புது தில்லி, ஆக.3: 'இரண்டு வாக்காளர் அடையாள அட்டைகளை வைத்திருந்ததன் மூலம் பிகார் மாநில சட்டப் பேரவை எதிர்க்கட்சித் தலைவரும் ராஷ்ட்ரீய ஜனதா தளம் தலைவருமான தேஜஸ்வி யாதவ் குற்றச் செயலைப் புரிந்துள்ளார்' என்று பாஜக தரப்பில் ஞாயிற்றுக்கிழமை குற்றஞ்சாட்டப்பட்டது.

'வரைவு வாக்காளர் பட்டியலில் தனது பெயர் விடுபட்டுள்ளது' என்று குற்றஞ்சாட்டி பத்திரிகையாளர்களிடம் தேஜஸ்வி சனிக்கிழமை காண்பித்த வாக்காளர் அடையாள எண், அவரின் அதிகாரபூர்வ வாக்காளர் அடையாள அட்டை எண்ணிலிருந்து மாறுபட்டுள்ளது' என்றும் பாஜக தெரிவித்துள்ளது.

பிகாரில் நிகழாண்டு இறுதியில் சட்டப்பேரவை தேர்தல் நடைபெற உள்ள நிலையில், மாநில வாக்காளர் பட்டியல் சிறப்புத் திருத்தத்தை தேர்தல் ஆணையம் மேற்கொண்டது. இந்தப் பணிகள் அண்மையில் நிறைவடைந்த நிலையில், மாநில வரைவு வாக்காளர் பட்டியலை தேர்தல் ஆணையம் வெள்ளிக்கிழமை வெளியிட்டது. இதில், மாநிலத்தில் 7.93 கோடியாக பதிவாகியிருந்த வாக்காளர்களின் எண்ணிக்கை, 7.24 கோடியாக குறைந்தது. 65 லட்சத்துக்கும் அதிகமான வாக்காளர்களின் பெயர்கள் பட்டியலில் இடம்பெறவில்லை. இதற்கு எதிர்க்கட்சிகள் கடும் கண்டனம் தெரிவித்து வருகின்றன.