போதைப் பொருள் ஒழிப்பு விழிப்புணர்வு

தருமபுரியில் காவல் துறை சார்பில் சர்வதேச போதைப் பொருள் ஒழிப்பு விழிப்புணர்வு பேரணி வியாழக்கிழமை நடைபெற்றது.

- 

தருமபுரி/ கிருஷ்ணகிரி, ஜூன் 26:

தருமபுரி மாவட்ட காவல் கண்காணிப்பாளர் அலுவலக வளாகத்தில் நடைபெற்ற நிகழ்ச்சியில் விழிப்புணர்வு பேரணியை மாவட்ட ஆட்சியர் ரெ. சதீஸ், மாவட்ட காவல் கண்காணிப்பாளர் மகேஸ்வரன் ஆகியோர் கொடியசைத்து தொடங்கிவைத்தனர்.

நிகழ்ச்சியில் 50க்கும் மேற்பட்ட காவல் துறையினர் இருசக்கர வாகனங்கள் மூலம் பேரணியாக இலக்கியம்பட்டி, அரசு மருத்துவக் கல்லூரி மருத்துவ மனை வழியாக தருமபுரி நான்கு சாலை வரை சென்று மீண்டும் மாவட்ட காவல் கண்காணிப்பாளர் அலுவலகத்தை வந்தடைந்தனர்.

போதைப் பொருள் ஒழிப்பு குறித்த பதாகைகளை ஏந்தியவாறு அரசு கல்லூரி மாணவ, மாணவியர் விழிப்புணர்வு ஏற்படுத்தினர். காவல் துறை உயர் அதிகாரிகள் மற்றும் கல்லூரி மாணவ, மாணவிகள் கலந்துகொண்டனர். நிகழ்வில் போதை ஒழிப்பு உறுதிமொழி ஏற்கப்பட்டது.

பென்னாகரம்... பென்னாகரம் அரசு கல்லூரி, அரசு பள்ளிகளில் புகையிலைப் பொருள்களுக்கு எதிரான விழிப்புணர்வு நிகழ்ச்சி, பேரணி வியாழக்கிழமை நடைபெற்றது.

பென்னாகரத்தை அடுத்த மாமரத்துப்பள்ளம் பகுதியில் உள்ள பென்னாகரம் அரசு கலை, அறிவியல் கல்லூரியில் நடைபெற்ற போதைப் பொருள்களுக்கு எதிரான விழிப்புணர்வு பேரணிக்கு கல்லூரி முதல்வர் இரா.சங்கர் தலைமை வகித்தார்.