இணைய வழி குற்ற நபர்கள் மீது குண்டர் சட்டம்; தமிழக அரசுக்கு உச்சநீதிமன்றம் பாராட்டு

இணைய வழி குற்றச் செயல்களில் ஈடுபடும் நபர்களுக்கு எதிராக குண்டர் தடுப்புச் சட்டம் என பொதுவாக அழைக்கப்படும் தடுப்புக் காவல் சட்டப் பிரிவைப் பயன்படுத்தி தமிழக அரசு மேற்கொள்ளும் நடவடிக்கைக்கு உச்சநீதிமன்றம் திங்கள்கிழமை பாராட்டு தெரிவித்தது.

- நமது சிறப்பு நிருபர்

நமது சிறப்பு நிருபர் புது தில்லி, ஜூன் 23:

இணைய மோசடி குற்றச்சாட்டுக்கு உள்ளானவருக்கு எதிரான தடுப்புக் காவல் நடவடிக்கையை உறுதிப்படுத்திய சென்னை உயர் நீதிமன்ற உத்தரவை எதிர்த்து தாக்கல் செய்யப்பட்ட மனுவை உச்சநீதிமன்ற நீதிபதிகள் சந்தீப் மேத்தா, ஜாய்மாலா பக்சி அடங்கிய அமர்வு திங்கள்கிழமை விசாரித்தது.

அப்போது, "இணைய வழி குற்றச் செயல்களில் ஈடுபடும் நபர்களுக்கு எதிராக தடுப்புக் காவல் சட்டம் பயன்படுத்தப்படுவதை, மாநிலத்தில் (தமிழகத்தில்) இருந்து வரும் ஒரு சரியான போக்காகக்கருதுகிறோம். இது மிகவும் வரவேற்கத்தக்க அணுகுமுறை. சைபர் குற்றவாளிகளுக்கு எதிராக சாதாரண குற்றவியல் சட்டங்கள் வெற்றியடைவதில்லை" என்று நீதிபதிகள் கூறினர்.