தமிழ் வளர்க்கும் தமிழவேள்

மிழ் கூறும் நல்லுலகம் பல அறிஞர்களைக் காலம்தோறும் கொண்டு சிறக்கிறது. அப்படியான அறிஞர்களுள் ஒருவர் 'தமிழவேள்' சிவாலயம் ஜெ.மோகன்.

- கோதை ஜோதிலட்சுமி படம்: சு.ஆனந்த்

சிறுவயது முதல் தமிழ் மீது காதல் கொண்டவர், பக்திநெறியில் தமிழ் வளர்ப்பவர், பல்வேறு அறப் பணிகளில் ஈடுபடுத்திக் கொண்டிருப்பவர், ஆதினகர்த்தர்கள் தொடங்கி தமிழ் ஆர்வம் கொண்ட குழந்தைகள் வரை அனைவரோடும் நட்பு பாராட்டுபவர், 'இறைவன் வரம் கொடுத்தால் நூல்களை என் பிள்ளைகளாகக் கேட்பேன்' என்று சொல்லக் கூடிய புத்தக ஆர்வலர், 'தமிழ்த் தாத்தா' உ.வே. சா. பழந்தமிழ் இலக்கியங்களைத் தேடிப் பதிப்பித்ததைப் போல பழைய உரைகளைத் தேடித் தேடி பதிப்பித்து வருபவர்.

உங்கள் சமயத் தமிழ் ஆர்வத்தின் பின்னணி என்ன?

இறையருளால் சைவ நெறியைப் பின்பற்றிய நல்லக் குடும்பத்தில் பிறந்தேன். எனது தந்தையும், அவரது தந்தையும் வாழ்க்கை விழுமியங்களைப் பயிற்றுவித்தனர். அவர்களே ஒழுக்கமான வாழ்க்கையை வாழ்ந்தனர். அந்த வழி என்னை உயர்ந்த இடத்துக்குக் கொண்டு வந்திருக்கிறது.

உங்கள் கல்வியின் பின்புலம் குறித்துக் கூறுங்கள்?

நான் பொறியியல் படித்தவன். ஆனால், பள்ளி நாள்களிலேயே அன்றாடம் ஏதாவது புத்தகத்தைப் பை கிராப்ட்ஸ் சாலையோரப் புத்தகக் கடைகளில் வாங்குவேன். வீட்டுக்கு வந்து, புரட்டிப் பார்ப்பேன். புத்தகங்களைப் படித்து, அவற்றைப் பாதுகாத்து வைத்திருப்பேன். நான் பிறந்து வளர்ந்த வீட்டில் அம்மாவின் நினைவாக வீட்டையே நூலகமாக மாற்றலாம் என்று எண்ணியிருக்கிறேன்.

இலக்கிய ஆர்வம் உங்களுக்குள் ஏற்பட என்ன, யார் காரணம்?

சாலையோரப் புத்தகக் கடைகளில் புத்தகங்களை வாங்கும்பொழுது, பல அறிஞர்களை அங்கே சந்தித்திருக்கிறேன். அவிநாசிலிங்கம் செட்டியார் அங்கேதான் அறிமுகமானார். சுவாமிஜி சித்பவானந்தர் காவி உடையோடு புத்தகங்களைத் தேடிக் கொண்டிருப்பதைப் பார்த்திருக்கிறேன். அவருடனான எனது தொடர்பு கடைசி வரை புனிதமான உறவாக இருந்தது. திருப்பராய்துறைக்கு அடிக்கடி செல்வதுண்டு. சுவாமிக்கு என் மீது அபிமானம் உண்டு.

உங்களின் வழிகாட்டி யார்?

எனக்கு வழிகாட்டி என்றால் அருள்செல்வர் நா. மகாலிங்கம்தான். ஆண்டுதோறும் அவர் வள்ளலார், மகாத்மா காந்தி விழாக்களை நடத்துவார். நான் தவறாமல் பங்கு கொள்வேன். அருள்செல்வருடன் நான் நெருக்கமாக இருந்தேன். அவர் கற்பித்ததை இன்றைக்கும் பின்பற்றுகிறேன்.

சேக்கிழார் ஆராய்ச்சி மையச் செயலராக இருக்கிறீர்கள்? அதுகுறித்துக் கூறுங்கள்...