ஐபிஎல் பெங்களூரு சாம்பியன்

18 ஆண்டுகால காத்திருப்பு நிறைவு

- 

அகமதாபாத், ஜூன் 3: ஐபிஎல் போட்டியின் இறுதி ஆட்டத்தில் ராயல் சேலஞ்சர்ஸ் பெங்களூரு 6 ரன்கள் வித்தியாசத்தில் பஞ்சாப் கிங்ஸை செவ்வாய்க்கிழமை வீழ்த்தி முதல் முறை சாம்பியன் ஆனது.

இறுதி ஆட்டத்தில் முதலில் பெங்களூரு 20 ஓவர்களில் 9 விக்கெட்டுகள் இழப்புக்கு 190 ரன்கள் சேர்க்க, பஞ்சாப் 20 ஓவர்களில் 7 விக்கெட்டுகள் இழந்து 184 ரன்களே எடுத்தது.

மிகப்பெரிய ரசிகர் பட்டாளத்துடன் போட்டியின் பிரதான அணிகளில் ஒன்றாகத் திகழும் பெங்களூரு, கோப்பை வெல்ல கடந்த 18 ஆண்டுகளாகப் போராடி வந்த நிலையில், அதற்குக் காலம் கைகூடியது.

18-ஐ ஜெர்ஸி எண்ணாகக் கொண்டிருக்கும் பெங்களூரு நட்சத்திர வீரர் விராட் கோலியின் கோப்பைக் கனவு, 18-ஆவது ஐபிஎல் போட்டியில் நிஜமாகியிருக்கிறது.

பெங்களூரு சாம்பியனான தருணத்தை உணர்ந்த கோலி, கண்ணீர் பொங்க உணர்ச்சிப்பூர்வமாக காணப்பட்டார்.

முன்னதாக இறுதி ஆட்டத்தில் டாஸ் வென்ற பஞ்சாப், பந்துவீச்சை தேர்வு செய்தது.