தென்மாநில எம்.பி.க்களின் கூட்டுக் குழு

அனைத்துக் கட்சிக் கூட்டத்தில் தீர்மானம்

- 

சென்னை, மார்ச் 5: தொகுதி மறுசீரமைப்பு தொடர்பான கோரிக்கைகளை வலியுறுத்தவும், அது சார்ந்த போராட்டத்தை முன்னெடுக்கவும் தென்மாநிலங்களின் எம்.பி.க்கள் அடங்கிய கூட்டு நடவடிக்கைக் குழு அமைக்க முதல்வர் மு.க.ஸ்டாலின் தலைமையில் தமிழக அரசு சார்பில் நடைபெற்ற அனைத்துக் கட்சிக் கூட்டத்தில் ஒருமனதாக தீர்மானம் நிறைவேற்றப்பட்டது.

மேலும், மக்களவையில் தமிழ்நாட்டின் இப்போதைய பிரதிநிதித்துவ சதவீதமான 7.18 என்பதில் எந்தக் காரணம் கொண்டும் மாற்றம் செய்யக் கூடாது எனவும் தீர்மானத்தில் வலியுறுத்தப்பட்டுள்ளது.

முதல்வர் தலைமையில் கூட்டம்: தொகுதி மறுசீரமைப்பால் தமிழ்நாட்டுக்கு ஏற்படும் பாதிப்பு தொடர்பாக விவாதிக்க தலைமைச் செயலகத்தில் முதல்வர் மு.க.ஸ்டாலின் தலைமையில் அனைத்துக் கட்சிக் கூட்டம் புதன்கிழமை நடைபெற்றது. திமுக, அதிமுக, திராவிடர் கழகம், காங்கிரஸ், பாமக, தேமுதிக, விசிக, இடதுசாரி கட்சிகள், நடிகர் விஜய் தலைமையிலான தமிழக வெற்றிக் கழகம், உலகத் தமிழர் பேரமைப்பு உள்பட மொத்தம் 59 கட்சிகள், அமைப்புகளிலிருந்து தலா 2 நிர்வாகிகள் பங்கேற்றனர்.