மணிப்பூர்: அரசுடன் குகி குழுக்கள் அமைதி ஒப்பந்தம்

பிராந்திய ஒருமைப்பாட்டை பராமரிக்க ஒப்புதல்

- 

புது தில்லி, செப். 4: மணிப்பூரில் வன்முறையைக் கைவிட்டு, அமைதித் தீர்வுக்குப் பணியாற்றவும், பிராந்திய ஒருமைப்பாட்டை பராமரிக்கவும் ஒப்புக்கொண்டு, மத்திய-மணிப்பூர் அரசுகளுடன் இரு குகி-ஜோ பழங்குடியினக் குழுக்கள் வியாழக்கிழமை முத்தரப்பு ஒப்பந்தத்தில் கையொப்பமிட்டன.

குகி தேசிய அமைப்பு (கேஎன்ஓ), ஐக்கிய மக்கள் முன்னணி (யுபிஎஃப்) ஆகிய அந்த இரு குழுக்களும், மாநிலத்தில் பதற்றத்துக்குரிய பகுதிகளில் இருந்து தங்கள் முகாம்களை வேறு இடத்துக்கு மாற்றவும் ஒப்புக்கொண்டுள்ளன. குகி தேசிய அமைப்பின்கீழ் 16 குழுக்களும், ஐக்கிய மக்கள் முன்னணியின்கீழ் 7 குழுக்களும் செயல்படுகின்றன.

பிரதமர் மோடி அடுத்த வாரம் மணிப்பூர் பயணம் மேற்கொள்வார் என எதிர்பார்க்கப்படும் சூழலில், மாநிலத்தில் அமைதியை மீட்டெடுக்க வழிவகுக்கும் வகையில் இந்த முக்கிய ஒப்பந்தம் கையொப்பமாகியுள்ளது.