சிபிசிஐடி போலீஸார் 8 வாரங்களுக்குள் இறுதி அறிக்கை தாக்கல் செய்ய உத்தரவு

கவின் ஆணவப் படுகொலை வழக்கில், சிபிசிஐடி போலீஸார் 8 வாரங்களுக்குள் நீதிமன்றத்தில் இறுதி அறிக்கையை தாக்கல் செய்ய சென்னை உயர்நீதிமன்ற மதுரை அமர்வு செவ்வாய்க்கிழமை உத்தரவிட்டது.

- 

மதுரை, ஆக. 5:

தூத்துக்குடி மாவட்டத்தைச் சேர்ந்த பொன். காந்திமதிநாதன் சென்னை உயர்நீதிமன்ற மதுரை அமர்வில் தாக்கல் செய்த மனு: தூத்துக்குடி மாவட்டம், ஆறுமுகமங்கலத்தைச் சேர்ந்த பொறியாளர் கவின், பாளையங்கோட்டையில் கடந்த மாதம் 27-ஆம் தேதி ஆணவப் படுகொலை செய்யப்பட்டார். இது தொடர்பாக பாளையங்கோட்டை காவல் நிலையத்தில் வழக்குப் பதிவு செய்யப்பட்டு, தற்போது சிபிசிஐடி காவல் துறையினர் விசாரித்து வருகின்றனர்.

இந்த வழக்கில், கவினை படுகொலை செய்த சுர்ஜித் கைது செய்யப்பட்டார். அவரது தந்தையும் கடந்த மாதம் 30-ஆம் தேதி கைது செய்யப்பட்டார்.

ஆனால், சுர்ஜித்தின் தாய் இதுவரை கைது செய்யப்படவில்லை. அதோடு, கொலை செய்யப்பட்ட தனது மகனை காவல் ஆய்வாளர் காசி பாண்டியன் ஏற்கெனவே மிரட்டியதாக கவினின் தந்தை புகார் அளித்தார். இருப்பினும், அவர் வழக்கில் சேர்க்கப்படவில்லை.