நேட்டோ இரட்டை நிலைப்பாடு

ரஷியா தவிர பிற நாடுகளில் இருந்தும் கச்சா எண்ணெய் இறக்குமதி

- 

புது தில்லி, ஜூலை 17: ரஷியாவுடன் வர்த்தகத்தைத் தொடர்ந்தால் இந்தியா மீது பொருளாதாரத் தடைகள் விதிக்கப்படலாம் என 'நேட்டோ' அமைப்பின் தலைவர் விடுத்த அச்சுறுத்தலுக்கு, 'இரட்டை நிலைப்பாடு எடுக்க வேண்டாம்' என்று வெளியுறவு அமைச்சகம் கண்டனம் தெரிவித்துள்ளது.

ரஷியாவிடம் இருந்து கச்சா எண்ணெய் வாங்கக் கூடாது என்று இந்தியாவை எச்சரிக்கும் அதே நாடுகள், ரஷியாவுடன் மறைமுக வழிகளில் வர்த்தகத்தில் ஈடுபடுவதாக விமர்சனம் உள்ள நிலையில், இந்தியா இவ்வாறு பதிலடி அளித்துள்ளது.

ரஷியா-உக்ரைன் போர் கடந்த மூன்று ஆண்டுகளாக நீடித்து வருகிறது. இந்தப் போரை முடிவுக்குக் கொண்டு வர அமெரிக்கா உள்ளிட்ட உலக நாடுகள் எடுத்த முயற்சிகள் தோல்வியைத் தழுவின.

இந்நிலையில், அடுத்த 50 நாட்களுக்குள் ரஷியா அமைதிப் பேச்சுவார்த்தைக்கு உடன்பட வேண்டும் அல்லது இரண்டாம் கட்டப் பொருளாதாரத் தடைகளை எதிர்கொள்ள நேரிடும் என்று அமெரிக்க அதிபர் டொனால்ட் டிரம்ப் எச்சரித்துள்ளார்.