ஹூதிக்கள் தாக்குதலில் மூழ்கியது மேலும் ஒரு கப்பல்

செங்கடல் பகுதியில் யேமனின் ஹூதி கிளர்ச்சிப் படையினர் நடத்திய தாக்குதலால் சரக்குக் கப்பல் மூழ்கியதில் 3 மாலுமிகள் உயிரிழந்தனர்; 5 பேர் மீட்கப்பட்டனர்; 16 மாலுமிகள் மாயமாகினர்.

- 

துபை, ஜூலை 10:

லைபீரிய கொடியேற்றப்பட்ட, கிரீஸ் நிறுவனத்துக்கு சொந்தமான ‘எம்வி எட்டர்னிட்டி சி’ என்ற சரக்குக் கப்பல் மீது ஈரான் ஆதரவு பெற்ற ஹூதி கிளர்ச்சியாளர்கள் துப்பாக்கியால் சுட்டும் வெடிகுண்டு ட்ரோன்களைப் பயன்படுத்தியும் திங்கள்கிழமை இரவு தாக்குதல் நடத்தினர். இதில் அந்தக் கப்பல் மூழ்கியது.

தாக்குதலின்போது அந்தக் கப்பலில் 22 மாலுமிகள் (21 பிலிப்பின்ஸ் நாட்டவர்கள், ஒரு ரஷியர்) மற்றும் மூன்று பேர் கொண்ட பாதுகாப்புக் குழுவினர் இருந்தனர். இதில் ஐந்து பிலிப்பின்ஸ் நாட்டவர்கள் மற்றும் ஒரு இந்தியர் புதன்கிழமை மீட்கப்பட்டனர். மூன்று பேர் உயிரிழந்தனர். இறந்தவர்கள் எந்தெந்த நாடுகளைச் சேர்ந்தவர்கள் என்பது குறித்து உடனடி தகவல் இல்லை.