கரோனா தடுப்பூசிக்கும் திடீர் மரணங்களுக்கும் தொடர்பில்லை: மத்திய அரசு

கரோனா தடுப்பூசிக்கும், திடீர் மரணங்களுக்கும் எந்தத் தொடர்பும் இல்லை என்பது ஆய்வுகளின் மூலம் நிரூபிக்கப்பட்டுள்ளதாக மத்திய அரசு தெரிவித்தது.

- 

புது தில்லி, ஜூலை 2:

மாரடைப்பு மரணங்களுடன் கரோனா தடுப்பூசியை தொடர்புபடுத்தி கர்நாடக முதல்வர் சித்தராமையா கருத்து வெளியிட்டிருந்த நிலையில், மத்திய அரசு திட்டவட்டமாக மறுத்துள்ளது.

இது தொடர்பாக, மத்திய சுகாதார அமைச்சகம் புதன்கிழமை வெளியிட்ட செய்திக் குறிப்பில் கூறப்பட்டதாவது:

கரோனா தடுப்பூசி செலுத்தப்பட்ட பிறகு காரணம் தெரியாத திடீர் மரணங்கள் நேரிடுவதாக கூற்றுகள் முன்வைக்கப்பட்டன. இதையடுத்து, இந்திய மருத்துவ ஆய்வு கவுன்சில் (ஐசிஎம்ஆர்), தேசிய நோய் கட்டுப்பாட்டு மையம் (என்சிடிசி), எய்ம்ஸ் உள்ளிட்ட பல்வேறு முகமைகள் மேற்கொண்ட ஆய்வில் திடீர் மரணங்களுக்கும் கரோனா தடுப்பூசிக்கும் எந்த நேரடி தொடர்பும் இல்லை என்பது உறுதியாக நிரூபிக்கப்பட்டது.

இந்தியாவில் மக்களுக்கு செலுத்தப்பட்ட கரோனா தடுப்பூசி பாதுகாப்பானது; திறன்மிக்கது என்பதுடன் மிக மிக அரிதாகவே பக்க விளைவை ஏற்படுத்தக் கூடும் என உறுதி செய்யப்பட்டது.