ரஷியா, அமெரிக்க கச்சா எண்ணெய் கொள்முதலை அதிகரிக்கும் இந்தியா!

இஸ்ரேல்-ஈரான் மோதல் தீவிரமடைந்ததன் பின்னணியில், ஜூன் மாதத்தில் ரஷியா மற்றும் அமெரிக்காவிலிருந்து கச்சா எண்ணெய் கொள்முதலை இந்தியா கணிசமாக அதிகரித்தது.

- 

புது தில்லி, ஜூன் 22:

இஸ்ரேலைத் தொடர்ந்து ஈரானின் 3 அணுசக்தித் தளங்களை அமெரிக்கா ஞாயிற்றுக்கிழமை தாக்கியது. இஸ்ரேல்-ஈரான் மோதலில் அமெரிக்காவும் இணைந்துள்ளது மத்திய கிழக்கு பிராந்தியத்தில் பதற்றத்தை அதிகரித்துள்ளது.

குறிப்பாக, ஈரான் எல்லையை ஒட்டிய ஹோர்முஸ் நீரிணை வழியாக நடைபெறும் எண்ணெய் விநியோகத்தில் இது இடையூறு ஏற்படுத்தும் என்று அச்சம் நிலவுகிறது.

உலகளாவிய எண்ணெய் விநியோகத்தில் 20 சதவீதத்தைக் கையாளும் ஹோர்முஸ் நீரிணை இந்தியாவுக்கும் முக்கியத்துவம் வாய்ந்ததாகும். ஏனெனில், இந்தியாவின் 40 சதவீத கச்சா எண்ணெயும், 50 சதவீத எரிவாயு இறக்குமதியும் இந்த நீரிணை வழியாகவே நடைபெறுவது குறிப்பிடத்தக்கது.

இந்தச் சூழலில், ரஷியாவிலிருந்து நடப்பு ஜூன் மாதத்தில் நாளொன்றுக்கு 20 முதல் 22 லட்சம் பீப்பாய் கச்சா எண்ணெய்யை இந்தியா இறக்குமதி செய்துள்ளது. இது கடந்த 2 ஆண்டுகளில் இல்லாத அதிகபட்சம் எனவும் இராக், சவூதி அரேபியா, ஐக்கிய அரபு அமீரகம், குவைத் ஆகிய மத்திய கிழக்கு நாடுகளிடமிருந்து வாங்கப்படும் மொத்த கொள்முதலைவிட அதிகம் எனவும் உலகளாவிய வர்த்தக ஆய்வு நிறுவனமான 'கெப்ளர்' தெரிவித்துள்ளது.