பயங்கரவாதிகள் தப்ப முடியாது

மத்திய அமைச்சர் அமித் ஷா உறுதி

- 

ஸ்ரீநகர், ஏப். 23: ஜம்மு-காஷ்மீரின் பஹல்காமில் சுற்றுலாப் பயணிகள் மீது பயங்கரவாதத் தாக்குதல் நடந்த பகுதியை மத்திய உள்துறை அமைச்சர் அமித் ஷா புதன்கிழமை நேரில் பார்வையிட்டு ஆய்வு மேற்கொண்டார்.

தாக்குதலில் உயிரிழந்தோரின் உடல்களுக்கு அஞ்சலி செலுத்திய அவர், 'பயங்கரவாதத்துக்கு இந்தியா ஒருபோதும் அடிபணியாது; பஹல்காமில் அப்பாவிகளைக் கொன்ற பயங்கரவாதிகள் தப்பிக்க முடியாது' என்று உறுதிபட தெரிவித்தார்.

ஜம்மு-காஷ்மீரின் அனந்த்நாக் மாவட்டம், பஹல்காமம் அருகே சுற்றுலாத் தலமான பைசாரன் பள்ளத்தாக்கில், சுற்றுலாப் பயணிகள் மீது பயங்கரவாதிகள் செவ்வாய்க்கிழமை பிற்பகலில் கொடூர தாக்குதல் நடத்தினர்.

வெளிநாட்டினர் இருவர் மற்றும் கர்நாடகம், குஜராத், கேரளம் என பல்வேறு மாநிலங்களைச் சேர்ந்த பயணிகள் என 26 பேர் கொல்லப்பட்டதோடு, பலர் காயமடைந்தனர்.