இந்தியா உள்பட 54 நாடுகள் மீது 12.5% கூடுதல் வரி

அமெரிக்க வர்த்தகப் பிரதிநிதி பரிந்துரை

- 

இந்தியா உள்பட 54 உலக நாடுகளிலிருந்து இறக்குமதி செய்யப்படும் பொருள்கள் மீது கூடுதலாக 12.5 சதவீத வரியை விதிக்க அமெரிக்க அரசுக்கு அமெரிக்க வர்த்தகப் பிரதிநிதி (யுஎஸ்டி ஆர்) பரிந்துரைத்துள்ளார்.

கட்டாய உழைப்பைக் கொண்டு உற்பத்தி செய்யப்பட்ட பொருள்கள் இறக்குமதி செய்வதைத் தடை செய்யத் தவறியதற்காக இந்தக் கூடுதல் வரி விதிப்பு நடவடிக்கையை மேற்கொள்ள பரிந்துரைக்கப்பட்டுள்ளதாக யுஎஸ்டி ஆர் குறிப்பிட்டுள்ளது.

இந்தியா, சீனா, வங்கதேசம், கம்போடியா, ஐரோப்பிய ஒன்றியம், இந்தோனேசியா, ஜப்பான், கொரியா, மலேசியா, மெக்சிகோ, நார்வே, சிங்கப்பூர், ஸ்விட்சர்லாந்து, தைவான், தாய்லாந்து, வியத்நாம் உள்பட 60 வர்த்தகக் கூட்டுறவு நாடுகளுக்கு எதிராக வர்த்தகச் சட்டப் பிரிவு 301-இன் கீழ் யுஎஸ்டி ஆர் மூலம் புதிய விசாரணையை அமெரிக்கா அண்மையில் தொடங்கியது.

'பிரிவு 301' கூறுவதென்ன ?: அமெரிக்க வர்த்தகத்தைப் பாதிக்கும் நியாயமற்ற வெளிநாடுகளின் நடைமுறைகளை நிவர்த்தி செய்வதற்காக இந்த 301- ஆவது பிரிவு அமெரிக்க வர்த்தகச் சட்டம் 1974-இல் வடிவமைக்கப்பட்டுள்ளது.