'பொட்டலமிட்டு வழங்கினால் சிக்கல் வராது'

எளிமைப்படுத்த கோரிக்கை

- கு.வைத்திலிங்கம்

விழுப்புரம், ஜூலை 13: தமிழகத்தில் நியாயவிலைக் கடைகளில் 'ப்ளூடூத்' மூலம் மின்னணு எடைத் தராசு இணைக்கப்பட்டு அத்தியாவசியப் பொருள்கள் விற்பனை செய்யும் நடைமுறையின் காரணமாக, ஒரு குடும்ப அட்டைதாரருக்கு பொருள்களை வழங்கக் குறைந்தது 8 முதல் 10 நிமிடங்கள் ஆகின்றன.

இதனால் நியாயவிலைக்கடைகளில் பொதுமக்கள் நீண்ட நேரம் காத்துக்கிடக்கும் நிலை உள்ளது. எனவே, நேர விரயத்தைத் தவிர்க்கும் வகையில், இந்த முறையை முற்றிலும் கைவிட வேண்டும் அல்லது காலதாமதம் ஏற்படாத வகையில், விற்பனை முறையை எளிமைப்படுத்த வேண்டும் என்று பொதுமக்களும் நியாயவிலைக் கடை பணியாளர்களும் வலியுறுத்துகின்றனர்.

தொடக்க வேளாண் கூட்டுறவுக் கடன் சங்கங்கள் மற்றும் நகரக்கூட்டுறவுக்கடன் சங்கங்களின் கீழும், பல்வேறு கூட்டுறவு சிறப்புப் பங்காடிகளின் கீழும் இயங்கும் நியாயவிலைக் கடைகள் மூலம் பொதுமக்களுக்கு அத்தியாவசியப் பொருள்கள் வழங்கப்பட்டு வருகின்றன. தற்போதைய நிலவரப்படி தமிழகத்தில் சுமார் 34,814 நியாயவிலைக் கடைகள் உள்ளன. முன்பு குடும்ப அட்டையாக இருந்தது தற்போது மின்னணு குடும்ப அட்டை வடிவத்தில் வழங்கப்பட்டு, குடும்ப அட்டைதாரர்களுக்கு பொருள்கள் வழங்கப்பட்டு வருகின்றன.