கமல்ஹாசன் ஏன் மன்னிப்பு கேட்க முடியாது?

தமிழில் இருந்தே கன்னடம் பிறந்தது என்று கூறியதற்கு நடிகர் கமல்ஹாசனால் ஏன் மன்னிப்புக் கேட்க முடியாது? என்று கர்நாடக உயர் நீதிமன்றம் செவ்வாய்க்கிழமை கேள்வி எழுப்பியது.

- 

பெங்களூரு, ஜூன் 3: 'தமிழில் இருந்தே கன்னடம் பிறந்தது என்று கூறியதற்கு நடிகர் கமல்ஹாசனால் ஏன் மன்னிப்புக் கேட்க முடியாது? என்று கர்நாடக உயர் நீதிமன்றம் செவ்வாய்க்கிழமை கேள்வி எழுப்பியது.

அதேவேளையில், அந்த மாநிலத்தில் 'தக் லைஃப்' திரைப்படம் வியாழக்கிழமை (ஜூன் 5) வெளியிடப்படாது என்று கமல்ஹாசன் தரப்பில் உயர் நீதிமன்றத்தில் தெரிவிக்கப்பட்டது.

இயக்குநர் மணிரத்னம் இயக்கத்தில் நடிகர் கமல்ஹாசன் நடித்துள்ள 'தக் லைஃப்' திரைப்படம் வியாழக்கிழமை (ஜூன் 5) வெளியாக உள்ளது. இந்தப் படத்தின் இசை வெளியீட்டு நிகழ்ச்சி சென்னையில் நடைபெற்றபோது, தமிழில் இருந்து கன்னடம் பிறந்ததாக கமல்ஹாசன் பேசினார்.

இதன்மூலம் கன்னட மொழியை அவர் சிறுமைப்படுத்திவிட்டதாக கன்னட அமைப்புகள் எதிர்ப்புத் தெரிவித்தன. அவருக்கு எதிராக கர்நாடகத்தில் கண்டனங்கள் வலுத்துவரும் நிலையில், தனது கருத்துக்கு மன்னிப்பு கேட்க கமல் மறுத்துவிட்டார்.

அவர் மன்னிப்பு கேட்கும் வரை, அந்த மாநிலத்தில் 'தக் லைஃப்' திரைப்படம் திரையிட அனுமதிக்கப்படாது என்று கர்நாடக திரைப்பட வர்த்தக சபை அறிவித்தது.