லஞ்ச வழக்கில் அரசு ஊழியர்கள் மீது நடவடிக்கை எடுப்பதில் காலதாமதம்

லஞ்ச வழக்குகளில் சம்பந்தப்பட்ட அரசுத் துறைகளுக்கு உரிய ஆவணங்கள் வழங்குவதில் ஒத்துழைப்பு இல்லாததால், தொடர்புடைய அரசு ஊழியர்கள் மீது நடவடிக்கை எடுப்பதில் காலதாமதம் ஏற்படுவதாக சென்னை உயர்நீதிமன்ற மதுரை அமர்வு அண்மையில் அதிருப்தி தெரிவித்தது.

- 

மதுரை, மே 27:

கரூர் மின் வாரியத்தில் கணக்கு மேற்பார்வையாளராகப் பணிபுரிந்தவர் என்.சரவணன். கடந்த 2011-ஆம் ஆண்டு ஓர் ஊழியரின் பணியிடை நீக்கத்தை ரத்து செய்து, அவரை மீண்டும் பணியில் சேர்ப்பதற்காக சரவணன் உள்பட 3 மின்வாரிய ஊழியர்கள் ரூ.5,000 லஞ்சம் வாங்கியபோது கைது செய்யப்பட்டனர். இந்த வழக்கில் சரவணன் பணியிடை நீக்கம் செய்யப்பட்டார். இந்த நிலையில், அவருக்கு கடந்த 2021-ஆம் ஆண்டு குற்றச்சாட்டு குறிப்பாணையை மின்சார வாரியம் வழங்கியது.

இந்தக் குறிப்பாணையை ரத்து செய்யக் கோரி, சரவணன் சென்னை உயர்நீதிமன்ற மதுரை அமர்வில் தாக்கல் செய்த மனு: குற்றச்சாட்டு சுமத்துபவர்கள் மீது ஒழுங்கு நடவடிக்கை எடுப்பதற்கு அரசு காலக்கெடு விதித்தது. இது தொடர்பாக நீதிமன்றங்களும் பல்வேறு உத்தரவுகளைப் பிறப்பித்தன. இருப்பினும், எனக்கு கடந்த 10 ஆண்டுகளுக்குப் பிறகு குற்றச்சாட்டு குறிப்பாணை வழங்கப்பட்டது. எனவே, இந்தக் குறிப்பாணையை ரத்து செய்ய வேண்டும் என அவர் கோரியிருந்தார்.