பயங்கரவாத எதிர்ப்பு: பஹ்ரைன் துணைப் பிரதமரிடம் இந்தியக் குழு விளக்கம்

பயங்கரவாதத்துக்கு எதிரான இந்திய நிலைப்பாட்டை பஹ்ரைன் துணைப் பிரதமர் ஷேக் காலித் பின் அப்துல்லா அல் கலீஃபாவிடம் அனைத்துக் கட்சி பிரதிநிதிகள் அடங்கிய நாடாளுமன்ற குழுவினர் ஞாயிற்றுக்கிழமை எடுத்துரைத்தனர்.

- 

மனாமா, மே 25:

பஹ்ரைன் சென்றுள்ள பாஜக எம்.பி. வைஜயந்த் பாண்டா தலைமையிலான குழு, எல்லை கடந்த பயங்கரவாதத்தால் இந்தியா எதிர்கொள்ளும் சவால்களையும் அதற்காக மேற்கொள்ளப்பட்டு வரும் நடவடிக்கைகள் குறித்தும் விளக்கியது.

இதுகுறித்து வைஜயந்த் பாண்டா வெளியிட்ட எக்ஸ் வலைதளப் பதிவில், 'நம்பிக்கை, பரஸ்பர மரியாதை என வரலாற்று ரீதியாக ஆழமான நட்புறவை இந்தியாவும் பஹ்ரைனும் கொண்டுள்ளன. பயங்கரவாதத்துக்கு எதிரான இந்த ஒருங்கிணைந்த போராட்டத்தில் அனைத்து விதமான பயங்கரவாதத்தையும் ஒழிப்பதற்கான இந்தியாவின் நடவடிக்கைகள் மற்றும் பரஸ்பர நல்லுறவு குறித்து பஹ்ரைனுடன் விவாதித்தோம்' என குறிப்பிட்டார்.