திற்பரப்பு நீர்வீழ்ச்சி

(மா) நகரத்தின் இயந்திர வாழ்க்கையிலும் போக்குவரத்து இரைச்சலிலிருந்தும் விடுபட்டு புத்துணர்ச்சியை அளிக்கும் சுத்தமான காற்றைச் சுவாசிக்க உதவும் ஒரு பயணத்தை மனம் தேடுகிறதா? இயற்கையின் அழகையும், அதன் வசீகரத்தையும் மாசில்லா வடிவத்தில் மனமும் உடலும் ஒருசேர அனுபவிக்க ஒரு சுற்றுலாத் தலம் இருக்கிறது. இந்தியாவின் கடைக்கோடி மாவட்டமான கன்னியாகுமரியில் அமைந்துள்ள அற்புதமான நீர்வீழ்ச்சியான 'திற்பரப்பு நீர்வீழ்ச்சி'தான் அது. 'குட்டி குற்றாலம்', 'கன்னியாகுமரியின் குற்றாலம்' என்றெல்லாம் அழைக்கப்படுகிறது.

- 

இந்த நீர்வீழ்ச்சியில் கொட்டும் நீர் கோதையார் ஆற்றிலிருந்து வருகிறது. சுமார் 15 மீட்டர் உயரமும் சுமார் 300 மீட்டர் அகலமும் கொண்டது. வயதான மலையரசி நரைமுடியை விரித்துப் போட்டவாறு அருவி குன்றிலிருந்து சறுக்கியவாறு இறங்குகிறது. திற்பரப்பு நீர்வீழ்ச்சியைச் செல்லும் வழியெல்லாம் கிராமப்புறங்களை ரசித்தவாறே பயணிக்கலாம்.

ஏப்ரல், மே மாதங்களிலும் கோடை மழை காரணமாக, மிதமான தண்ணீருடன் விழும். ஜூலை முதல் பிப்ரவரி வரை நீர் வேகமாகவும், ஆக்ரோஷமாகவும் விழும். அப்போது குளிக்க முடியாது. மார்ச், ஏப்ரல், மே மாதங்களில் படகு சவாரி, நீச்சல், கோயில் வழிபாடு செய்யும் வசதிகள் நீர்வீழ்ச்சிக்கு அருகில் உள்ளன. ஜூன் முதல் செப்டம்பர் வரை திற்பரப்பு அருவிக்கு வருகை தருவதைத் தவிர்க்க வேண்டும். ஏனெனில் அப்போது நீரோட்டம் கணிக்க முடியாததாக இருக்கும் என்பதால், பார்வையாளர்களுக்கு ஆபத்தை ஏற்படுத்தும். மழைப்பொழிவு அதிகமாக இருப்பதினால், வந்து போவதில் சுற்றுலாப் பயணிகளுக்கும் சிரமம் இருக்கும்.