சாதனைத் திட்டங்கள், சவால்களுடன் 5-ஆம் ஆண்டில் திமுக அரசு

சாதனைத் திட்டங்களை முன்வைத்து, சவால்களை எதிர்கொண்டு ஐந்தாவது ஆண்டில் முதல்வர் மு.க.ஸ்டாலின் தலைமையிலான அரசு அடியெடுத்து வைக்கிறது.

- 

சென்னை, மே 6:

கடந்த 2021-ஆம் ஆண்டு கரோனா நோய்த்தொற்று எனும் கடினமான காலத்தில் மே 7-ஆம் தேதி திமுக தலைமையிலான அரசு ஆட்சிப் பொறுப்பேற்றது. அப்போது கடுமையான நிதிச் சிக்கல்களுக்கு இடையே மிக முக்கியத் திட்டங்களை முன்னெடுத்தது.

குறிப்பாக, மகளிருக்கு இலவச பேருந்துப் பயணம், தொடக்கக் கல்வி பயிலும் குழந்தைகளுக்கு காலை உணவு, உயர் கல்வி பயிலும் பெண்களுக்கு தலா ரூ.1,000 வழங்கும் புதுமைப் பெண் போன்ற சமூகப் பாதுகாப்பை உறுதி செய்யும் திட்டங்கள் அறிவிக்கப்பட்டு செயல்படுத்தப்பட்டன.

எதிர்க்கட்சிகள் கேள்வி: கடும் நிதிச் சுமைகளுக்கு இடையே மகளிருக்கு உரிமைத் தொகை வழங்கும் திட்டம் குறித்தும் அரசு ஆலோசித்தது. இந்தத் திட்டம் எப்போது செயல்பாட்டுக்கு வரும் என எதிர்க்கட்சிகள் கடுமையான கேள்விகளை முன்வைத்தன. இதைத் தொடர்ந்து, 2023-ஆம் ஆண்டு செப்டம்பரில் மகளிர் உரிமைத் தொகை திட்டம் நடைமுறைக்கு வந்தது.

இந்தத் திட்டத்தின் கீழ் 1.16 கோடி மகளிர் பயன் பெற்று வருகின்றனர். இதேபோன்று, பள்ளிக் குழந்தைகளுக்கான காலை உணவுத் திட்டத்தின்கீழ் 17.53 லட்சம் பேரும், புதுமைப் பெண் திட்டத்தால் 4.9 லட்சம் கல்லூரி மகளிரும், மாணவர்களுக்கு ரூ.1,000 வழங்கும் தமிழ்ப் புதல்வன் திட்டத்தின் கீழ் 4.25 லட்சம் பேரும் பயன் பெற்று வருகின்றனர்.