காலிறுதிக்கு முந்தைய சுற்றில் ஜோகோவிச், ரூட்

மியாமி ஓபன் டென்னிஸ் போட்டியில் முன்னணி வீரர்களான செர்பியாவின் நோவக் ஜோகோவிச், நார்வேயின் கேஸ்பர் ரூட் ஆகியோர் காலிறுதிக்கு முந்தைய சுற்றுக்கு திங்கள்கிழமை முன்னேறினர்.

- 

மியாமி கார்டன்ஸ், மார்ச் 24:

ஆடவர் ஒற்றையர் 3-ஆவது சுற்றில், உலகின் 5-ஆம் நிலை வீரரான ஜோகோவிச் 6-1, 7-6 (7/1) என்ற செட்களில் அர்ஜென்டீனாவின் கமிலோ யுகோவை வென்றார். அடுத்த சுற்றில் அவர், இத்தாலியின் லொரென்ஸோ முசெத்தியை எதிர்கொள்கிறார். முசெத்தி முந்தைய சுற்றில், 4-6, 6-2, 6-3 என, 18-ஆம் இடத்திலிருந்த கனடாவின் ஃபெலிக்ஸ் ஆகர் அலியாசிமேவை வென்றார்.

போட்டித்தரவரிசையில் 5-ஆம் இடத்திலிருக்கும் ரூட் 6-4, 7-6 (7/4) என்ற கணக்கில், 30-ஆம் இடத்திலிருந்த சிலியின் அலெக்ஸாண்ட்ரோ டபிளோவை வெளியேற்றினார். ரூட் அடுத்த சுற்றில், ஆர்ஜென்டீனாவின் பிரான்சிஸ்கோ செருண்டோலோவுடன் மோதுகிறார்.

டாமி பால், சிட்சிபாஸுக்கு அதிர்ச்சி: போட்டித்தரவரிசையில் 23-ஆம் இடத்திலிருக்கும் செருண்டோலோ முந்தைய சுற்றில், 6-2, 7-6 (7/4) என்ற வகையில், போட்டித்தரவரிசையில் 12-ஆம் இடத்திலிருந்த அமெரிக்காவின் டாமி பாலை தோற்கடித்தார்.

பிரான்ஸின் கேல் மான்ஃபில்ஸ் 7-5, 5-7, 7-6 (7/1) என்ற செட்களில் ஸ்பெயினின் ஜேமி முனாரை வீழ்த்தினார். அடுத்து அவர், அமெரிக்காவின் செபாஸ்டியன் கோர்டாவை சந்திக்கிறார். போட்டித்தரவரிசையில் 24-ஆம் இடத்திலிருக்கும் கோர்டா முந்தைய சுற்றில் 7-6 (7/4), 6-3 என்ற கணக்கில், 9-ஆம் இடத்திலிருந்த கிரீஸின் ஸ்டெஃபனோஸ் சிட்சிபாஸை சாய்த்தார்.