அறக்கட்டளை வாகன தாக்குதல்: இஸ்ரேலுக்கு பைடன் கண்டனம்

போரால் பாதிக்கப்பட்டுள்ள காஸாவில் பொதுமக்களுக்கு உணவுப் பொருள்களை விநியோகித்து வந்த தங்கள் நாட்டு அறக்கட்டளையின் சர்வதேச ஊழியர்கள் இஸ்ரேல் தாக்குதலில் கொல்லப்பட்டதற்கு அமெரிக்க அதிபர் ஜோ பைடன் கடும் கண்டனம் தெரிவித்துள்ளார்.

இது குறித்து அவர் வெளியிட்டுள்ள அறிக்கையில் தெரிவிக்கப்பட்டுள்ளதாவது:

காஸாவில் இஸ்ரேல் நடத்திய வான்வழித் தாக்குதலில் "வேர்ல்டு சென்ட்ரல் கிச்சன்' (டபிள்யுசிகே) அறக்கட்டளையைச் சேர்ந்த 7 ஊழியர்கள் உயிரிழந்த சம்பவம் கோபத்தையும், துயரத்தையும் ஏற்படுத்துகிறது.

போருக்கு இடையே சிக்கித் தவிக்கும் அப்பாவி பொதுமக்களின் பசியைப் போக்குவதற்காக அவர்களுக்கு உணவு அளிக்கும் பணியில் அந்த 7 பேரும் ஈடுபட்டிருந்தனர். சுயநலமின்றி அந்தப் பணியில் ஈடுபட்டிருந்தபோது அவர்கள் கொல்லப்பட்டது மிகவும் கொடுமை.

இந்தத் தாக்குதல் குறித்து விசாரணை நடத்தப்படும் என்று இஸ்ரேல் உறுதியளித்துள்ளது. அதனை அந்த நாடு உடனடியாக நிறைவேற்றவேண்டும். விசாரணையை இழுத்தடிக்காமல் விரைவில் முடித்து, தாக்குதலுக்குக் காரணமானவர்களை சட்டத்தின்முன் இஸ்ரேல் நிறுத்தவேண்டும். இந்த விசாரணையின் முடிவுகள் வெளிப்படையாக அறிவிக்கப்படவேண்டும்.