மத்திய அரசு திட்டங்களில் திமுக அரசின் 'ஸ்டிக்கர்'- பிரதமர் மோடி குற்றச்சாட்டு

மத்திய அரசின் திமுக அரசின் திட்டங்களுக்கு, ‘ஸ்டிக்கர்' ஒட்டப்படுவதாக பிரதமர் நரேந்திர மோடி சென்னையில் திங்கள்கிழமை நடைபெற்ற பாஜக பொதுக்கூட்டத்தில் குற்றஞ்சாட்டினார்.

'தமிழகத்தின் வளர்ச்சிப் பணிகளுக்கு ஒதுக்கப்படும் நிதியை யாரும் கொள்ளையடிக்க விடமாட்டேன்.

திமுக அரசு கொள்ளையடித்த பணம் மீட்கப்பட்டு தமிழக மக்களுக்காக நிச்சயம் செலவு செய்யப்படும்; இது மோடியின் உத்தரவாதம் என்றும் அவர் திட்டவட்டமாகத் தெரிவித்தார்.

மக்களவைத் தேர்தல் நெருங்கும் நிலையில் தமிழகத்தில் தேர்தல் பிரசாரத்தை பிரதமர் மோடி ஏற்கெனவே தொடங்கிவிட்டார். கடந்த பிப்.28-இல் தூத்துக்குடியில் அரசு நிகழ்ச்சியைத் தொடர்ந்து திருநெல்வேலியில் பாஜக பொதுக்கூட்டத்தில் அவர் பங்கேற்றார்.

இந்த நிலையில், சென்னைக்கு திங்கள்கிழமை வருகை தந்த பிரதமர் மோடி, நந்தனம் ஒய்எம்சிஏ மைதானத்தில் நடைபெற்ற பாஜக பொதுக் கூட்டத்தில் கலந்து கொண்டார்.

கூட்டத்தில் அவர் பேசியதாவது: எனக்கும், தமிழகத்துக்கும் இடையிலான உறவு மிகவும் பழைமையானது. நான் தமிழகத்துக்கு வரும்போதெல்லாம் சிலருக்கு வயிற்றில் புளியைக் கரைக்கிறது. அதேபோல, தமிழகத்தில் பாஜகவுக்கு மக்கள் ஆதரவு தொடர்ந்து வலுவடைந்து வருவதும் அவர்களுக்கு அச்சத்தை ஏற்படுத்தியுள்ளது.