மதிப்பான வாழ்வைத் தரும் மணக்குள விநாயகர்

வாக்கு தரும்; நல்வாழ்வு தரும். வணங்கி வந்து நிற்பவருக்குக் கேட்டதெல்லாம் தரும் வள்ளல் மணக்குள விநாயகர்.

- 

மகாகவி சுப்ரமணிய பாரதியார் அருமையான பாடல்களை இந்த விநாயகர் மீது பாடி இருக்கிறார். புதுவை என்றாலே இந்த மணக்குள விநாயகர் பெயர் தாமாகவே நமது நினைவுக்கு வரும். "பிடித்து வைத்தால் பிள்ளையார்" என்பார்கள்.

எந்த விழாவாக இருந்தாலும் இவருக்கு முதல் மரியாதை உண்டு. எந்தக் காரியத்திலும் துன்பங்கள் (விக்கினங்கள்) இல்லாமல் நிறைவேற இவர் அருள் தேவை.

எனவே சின்ன கிராமமாக இருந்தாலும் அங்கு விநாயகர் ஆலயம் அவசியம் இருக்கும். மிகவும் எளிமையானவர் என்பதால் ஆற்றங்கரையிலும், தொழிற்சாலை வாயிலிலும், கல்லூரி, பள்ளி வாயிலிலும், ஏன் சிலர் வீட்டு வாயிலிலும் கூட பிள்ளையார் கோயில் அமைப்பு இருக்கும்.

அந்தப் பிள்ளையாருக்குப் பிரியமாக ஒரு பெயரையும் கொடுத்து பூஜை செய்து வருவதைப் பார்க்கிறோம். தமிழ்நாட்டில் விநாயகருக்குச் சிறப்பாக அமைந்த ஆலயங்கள் சில இருக்கின்றன.

பிள்ளையார்பட்டி, ஈச்சனாரி, கணபதி அக்ரஹாரம் இப்படி பல பிள்ளையார் கோயில்கள் இருக்கின்றன. அந்த வரிசையில் புதுவைக்குப் புகழ் சேர்க்கும் விநாயகர் ஆலயம் மணக்குள விநாயகர் ஆலயம்.

செல்லும் வழி

புதுச்சேரி நகரின் மையப்பகுதியில் கடற்கரை அருகே இந்த ஆலயம் இருக்கிறது. புதுவையில் பேருந்து நிலையத்திலிருந்து நகரப் பேருந்து, டெம்போ அல்லது ஆட்டோ மூலம் மிக எளிதாக ஆலயத்தை அடையலாம்.

கோயில் அமைப்பு

8,000 சதுர அடி பரப்பில் இந்தக் கோயில் அமைந்துள்ளது.

அழகான சிறிய ஆலயம். 16 ஆம் நூற்றாண்டில் கட்டப்பட்ட கோயில் என்கிறார்கள். ராஜகோபுரம். உள்ளே பொன் முலாம் பூசப்பட்ட 18 அடி உயர தங்கத் தகடு வேயப்பட்ட துவஜஸ்தம்பம். இது இந்தக் கோயிலின் சிறப்புக்களில் ஒன்று. முன்னாள் சலவைக்கற்களால் இழைக்கப்பட்ட ஒரு மண்டபம்.

பிராகாரம் சுற்றிலும் விநாயகரின் உருவங்கள் மிக அழகாகக் காட்சி தருகின்றன. விநாயகர் வடிவில் தான் எத்தனை வேறுபாடுகள்? எத்தனை பெயர்கள்? பாலகணபதி, வீரசக்தி கணபதி, பிங்கள கணபதி, ஊர்த்துவ கணபதி, சயனகணபதி, சதுர்முக கணபதி, ஹேரம்ப கணபதி, பஞ்சமுக கணபதி.