Pam mae'n flwyddyn fawr i ffrwythau'r goedwig

O S yw'n ymddangos eich bod wedi sylwi ar fwy o gnau a ffrwythau yn ein coedwigoedd nag arfer eleni gallai hynny fod oherwydd ei bod yn "flwyddyn fas".

- GAN ERYL CRUMP

Yn ôl Coed Cadw, Ymddiriedolaeth y Coetir yng Nghymru, mae blynyddoedd mas (mast year yn Saesneg) yn digwydd tua phob pum i ddeg mlynedd ac yn cyfeirio at flynyddoedd pan fydd rhai rhywogaethau o goed a phlanhigion yn cynhyrchu cnwd o gnau a ffrwythau sy'n fwy na'r arfer.

Un o'r damcaniaethau mwyaf poblogaidd ynghylch pam mae planhigion yn ymddwyn fel hyn yw er mwyn rheoli maint poblogaeth y ysglyfaethwyr a sicrhau eu goroesiad eu hunain. Mae cynhyrchu llai o gnwd am sawl blwyddyn yn sicrhau bod llai o fwyd ar gael i'r ysglyfaethwyr, ac mae eu poblogaeth yn lleihau.

Mae'r cynnydd sydyn mewn cynhyrchu ffrwythau a cnau yn golygu y bydd llawer mwy yn cael eu cynhyrchu nag y gall y boblogaeth lai o anifeiliaid eu bwyta, gan sicrhau bod o leiaf rhywfaint o'r cnwd yn mynd ymlaen i dyfu planhigion newydd. Fodd bynnag, mae'r maint cnwd mwy yn dod â chost i'r goeden, gan atal ei thwf y flwyddyn honno er budd cynhyrchu cnau.