Mae 'potran yn yr ardd' yn rhoi pleser mawr i Stifyn

ATGELODD actor ac impresario a wnaeth hanes gyda'r gusan hoyw gyntaf ar deledu Prydain ei fod yn tyfu blodau i ymlacio o fyd prysur adloniant.

- 

Mae Stifyn Parri, sy'n hanu o'r Rhos, ger Wrecsam, ac sydd bellach yn byw yn Sain Ffagan ger Caerdydd, wrth ei fodd yn treulio amser yn ei ardd i hamddena ac ymlacio.

Rhannodd ei angerdd am arddio gyda'r cyflwynydd teledu Meinir Gwilym pan gafodd ei ffilmio ar gyfer eitem ar gyfres arddio flaenllaw S4C, Garddio a Mwy. Bydd y bennod gyda Stifyn yn cael ei dangos am 8.25pm nos Lun, 2 Mehefin, a bydd wedyn ar gael ar alw ar S4C Clic a BBC iPlayer a llwyfannau eraill.

Yn ôl y seren allblyg, mae'n postio delweddau o flodau lliwgar yn tyfu yn yr ardd neu blanhigion tŷ y mae wedi'u meithrin fel ffordd o godi ysbryd "ffrindiau, teulu a dieithriaid."

Dechreuodd y cyfan pan oedd pawb dan glo yn ystod y pandemig Coronafeirws ac meddai: "Roedd yr ymateb mor gadarnhaol nes i dynnu llun arall y diwrnod canlynol ac rydw i wedi bod yn postio delweddau ar Instagram a Facebook bob dydd ers hynny.

"Maen nhw wedi dod mor boblogaidd nes bod pobl yn fy ffonio os nad ydw i wedi postio erbyn un ar ddeg o'r gloch y bore i wneud yn siwr fy mod i ar dir y byw," meddai Stifyn.

Dywed Stifyn nad oes ganddo unrhyw hyfforddiant garddio ffurfiol ac nad yw'n gwybod enwau llawer o'r planhigion sy'n tyfu yn yr ardd: "Dwi wrth fy modd yn potran yn yr ardd. Rwy'n plannu pethau'n reddfol ac os nad ydy planhigion yn hoffi lle maen nhw'n tyfu mi fyddan nhw'n rhoi gwybod i chi yn ddigon buan, ac maen nhw yr un fath os ydyn nhw'n hoffi eu lle.