Côr yn parhau'r cysylltiad gyda chôr Pavarotti

BYDD côr o Ogledd Cymru a helpodd i ysbrydoli Luciano Pavarotti yn perfformio yn yr Eidal i nodi'r hyn a fyddai wedi bod yn ben-blwydd y chwedl operatig yn 90 oed.

- 

Bydd 36 o aelodau o Gor Meibion Froncysyllte yn teithio i'w ddinas enedigol, Modena, i ganu ochr yn ochr â hen gôr Pavarotti, Chorus Rossini. Bydd y perfformiad yn rhan o Wyl Bel Canto ar Hydref 12 - yr union ddyddiad y byddai'r tenor Eidalaidd wedi dathlu ei ben-blwydd.

Canmolwyd Côr y Fron, a groesawodd Pavarotti i Eisteddfod Ryngwladol Llangollen yn 1955 a 1995, am barhau â'i gysylltiad unigryw â'r diweddar seren.

Datgelodd Pavarotti ei hun fod ei ymweliad cyntaf â'r ŵyl ym 1955 wedi cynnau'r fflam a ysbrydolodd ei yrfa ryngwladol ddisglair.

Mae'r daith i Modena yn bosibl diolch i gefnogaeth Mario Kreft MBE a'i wraig, Gill, perchnogion sefydliad gofal Parc Pendine sy'n noddi'r celfyddydau drwy Ymddiriedolaeth Celfyddydau a Chymuned Pendine, gan gefnogi mentrau diwylliannol a chymunedol.

Mae'r cwpl hefyd yn gefnogwyr hirdymor o Eisteddfod Llangollen ac ym mis Gorffennaf fe wnaethant deithio gyda gweddw Pavarotti, Nicoletta Mantovani, pan gyrhaeddodd y digwyddiad eleni ar y trên o Gorwen i Langollen.

Ar y daith honno nododd 70 mlynedd ers profiad cyntaf ei diweddar ŵr yn yr Eisteddfod lle perfformiodd gyda'i dad, Fernando, fel rhan o Chorus Rossini, yn ogystal â 30 mlynedd ers iddo ddychwelyd fel seren fyd-eang ar gyfer cyngerdd hynod boblogaidd yn 1995.