Cerddor unigryw yn diddanu preswylwyr cartref Bryn Seiont

Bu cerddor gwreiddiol a syfrdanodd y beirniaid Simon Cowell ac Amanda Holden ar Britain's Got Talent yn diddanu preswylwyr cartrefi gofal yn ddiweddar - drwy chwarae tebot a phibell dyfrio’r ardd.

- 

Dechreuodd perfformiad Dennis Frere-Smith yng nghartref gofal Bryn Seiont ym Mharc Pendine yng Nghaernarfon yn ddigon confensiynol gyda dehongliad cyffrous o ‘When the Saints Go Marching In’ ar y trwmped.

Ar ôl dawnsio gyda rhai o'r preswylwyr, dangosodd Dennis ystod lawn ei ddoniau swynol, gan symud o'r aruchel i'r doniol a gwirion - gan gyfnewid ei drwmped am debot, pibell gardd ac yna pibell gawod.

Dyma’r perfformiad a syfrdanodd y beirniaid ar sioe boblogaidd ITV y llynedd gydag Amanda Holden yn nodi: "Fe wnaeth fy atgoffa o adloniant hen ffasiwn. Does dim sioe arall ar y ddaear lle byddech chi'n gallu chwarae pibell ddyfrio - mae'n berffaith ar gyfer Britain's Got Talent. Rydw i’n mynd i gychwyn hyn gydag ‘Ie’!"

Ychwanegodd Simon: "Rwy'n bendant yn dweud ‘Ie’.”

Roedd yna hefyd fawd i fyny gan eu cyd-feirniad Alesha Dixon ond disgrifiodd Bruno Tonioli berfformiad Dennis fel “gwastraff aer”.

Aeth Dennis ymlaen i'r rownd ganlynol a pherfformiodd ei sioe ar lwyfan enwog y London Palladium ond methodd â chyrraedd rownd gynderfynol y sioe.

Ond roedd yn bendant yn foment y Botwm Aur i breswylwyr a staff Bryn Seiont Newydd a ganmolodd Dennis fel “maestro cerddorol”.