Addysgu busnesau lleol i weld manteision Sero Net

ISGWYLIR i gynllun sero net arloesol chwistrellu dros £600,000 i economi Dyffryn Clwyd dros y pum mlynedd nesaf.

- 

Cyflwynwyd Cam Un o'r rhaglen Gorwelion Sero Net y llynedd ar Ystâd Ddiwydiannol Colomendy yn Ninbych lle derbyniodd dros 40 o fusnesau hyfforddiant ac ymgynghoriaeth am ddim i'w helpu i leihau eu hallyriadau carbon gyda 13 ohonynt yn denu dros £300,000 mewn grantiau ar gyfer cynlluniau adnewyddadwy.

Rhagwelir y bydd y busnesau dan sylw yn torri eu biliau ynni ac yn arbed £250,000 iddynt eu hunain dros bum mlynedd a gallai Cam Dau ychwanegu £375,000 arall at y ffigwr trawiadol hwnnw.

Mae'r cynllun unwaith eto yn cael ei redeg gan One Earth Education, y cwmni a sefydlwyd gan Tom Powell, o Ddinbych, a gafodd ei gomisiynu i redeg y prosiect gan yr asiantaeth adfywio Cadwyn Clwyd.

Y tro hwn mae gorwelion One Earth Education wedi'u hehangu i gynnwys busnesau ym Mharc Busnes Llanelwy ac ar Ystâd Ddiwydiannol Lôn Parcwr yn Rhuthun yn ogystal â Colomendy yn Ninbych.

Gallai defnydd tebyg y tro hwn weld gwerth £350,000 pellach o arbedion ynni tra eu bod yn anelu at helpu cwmnïau i sicrhau grantiau gwerth dros £300,000.

Byddant yn recriwtio 60 o fusnesau i fanteisio ar raglen o hyfforddiant addysgol am ddim gan helpu cwmnïau i weithredu strategaethau i leihau eu hallyriadau carbon, diogelu swyddi ac arbed arian tra bydd cyfle hefyd i wneud cais am grantiau o hyd at £50,000 ar gyfer prosiectau unigol.