பெங்களூரு விபத்து விளையாட்டல்ல, உயிர்கள் விக்கெட்டுகளல்ல

ஐ .பி.எல்., கிரிக்கெட் தொடரில் வெற்றி பெற்ற பெங்களூரு அணியினருக்கு அரசு சார்பில் வரவேற்பும் , அணி சார்பில் பாராட்டும் நடந்தது. இதில் அணி சார்பில் சின்னசாமி மைதானத்தில் நடந்த பாராட்டு விழாவில், வீரர்களை பார்க்கும் ஆவலில் அலையலையாய் திரண்ட ரசிகர்களின் கூட்ட நெரிசலில் சிக்கி 11 பேர் பரிதாபமாக உயிரிழந்தனர்.

- 

50க்கும் மேற்பட்டோர் பலத்த காயம் அடைந்துள்ளனர். இந்த சம்பவம் குறித்து இயற்கைக்கு மாறான மரணம் என வழக்குப்பதிவு செய்து போலீசார் விசாரணை நடத்தி வருகின்றனர். ரணகளத்திலும் கிளுகிளுப்பு என்பது போல், ரத்தமும் சதையுமாய் ரசிகர்கள் செத்துக்கொண்டிருக்க, நிகழ்ச்சியை ரத்து செய்யாமல், கொண்டாட்டம் போட்டது மிகுந்த அதிருப்தியையும் அதிர்ச்சியையும் உருவாக்கியுள்ளது. கூக்குரல், மரண ஓலம் நடுவே வீரர்கள் வெற்றியுரையாற்றியது ரசினர் மீதான நட்சத்திரங்களின் அபிப்பிராயத்தை பிரதிபலிப்பதாக உள்ளது. இது மிகவும் குரூரம். இதற்கு அரசும் அணியும் பதில் கூறவேண்டிய அவசியம் உள்ளது. நடந்த சம்பவத்திற்கு மாநில துணை முதல்வர் சிவகுமார் மன்னிப்பு கேட்டுள்ளார். மன்னிப்பு மட்டுமே மன ரணத்தை ஆற்றுமா என்று தெரியவில்லை. கூட்ட நெரிசலில் சஉயிரிழந்தவர்களில் தமிழகத்தைச் சேர்ந்த ஒரு சிறுமி மற்றும் 2 இளம்பெண்கள் அடக்கம். நம் இளைய சமுதாயத்தின் ரசிக மனநிலை இந்தளவு அதிதீவிரம் கொண்டதாக இருப்பது கவலைக்குரியது. இதே ஆர்வமும் அக்கறையும் அறிஞர்கள் உரையை கேட்கவோ, முற்போக்கு கலை நிகழ்ச்சியை ரசிக்கவோ இல்லாதிருப்பது ரசிக மனோபாவத்தின் வறட்சியை காட்டுகிறது ..