தீவிரவாதத்துக்கு தக்க பதிலடி கொடுக்கப்படும்

பிரதமர் மோடி உறுதி

- 

டெல்லியில் கார் குண்டு வெடித்து 13 பேர் இறந்த விவகாரம் தொடர்பாக, பாதுகாப்புத்துறை விவகாரங்களுக்கான அமைச்சரவை கூட்டம் நேற்று டெல்லியில் நடந்தது. இந்த கூட்டத்தில் பிரதமர் மோடி பேசுகையில், “தீவிரவாதத்துக்கு தக்க பதிலடி கொடுக்கப்படும். பயங்கரவாதம் மீது துளியும் சகிப்பு தன்மை காட்ட முடியாது என குறிப்பிட்டார்.

டெல்லியில் உள்ள செங்கோட்டை எதிரே உள்ள போக்குவரத்து சிக்னல் பகுதியில் ஒரு கார் திடீரென வெடித்து சிதறியது. அதன் பாகங்கள் நாலாபுறத்திலும் சிதறி விழுந்தன. கார் முற்றிலும் தீப்பிடித்து எரிந்தன. இதன் காரணமாக பக்கத்தில் நின்ற பல வாகனங்களும் தீப்பிடித்தன.

இந்த கார் வெடிவிபத்தில் 30-க்கும் மேற்பட்டோர் படுகாயம் அடைந்தார்கள். இதில் 13 பேர் பலியானதாக தகவல்கள் தெரிவிக்கப்பட்டது. 24 பேர் மருத்துவ மனையில் சிகிச்சை பெற்று வருகிறார்கள்.

சம்பவ இடத்தில் துப்பாக்கிக் குண்டு கிடைத்து இருப்பதாகவும் போலீசார் தெரிவித்துள்ளனர். இதற்கிடையே இந்த வழக்கு தேசிய புலனாய்வு முகமையிடம் (என்.ஐ.ஏ.) ஒப்படைக்கப்பட்டு இருப்பதாகவும் தெரிவிக்கப்பட்டு இருந்தது.

காரை ஓட்டிச்சென்றவர் யார்? என கண்காணிப்பு கேமரா பதிவுகள் மூலம் தெரியவந்துள்ளது. அவர் ஜம்மு காஷ்மீரில் புல்வாமாவைச் சேர்ந்த உமர் முகமது (வயது 35) ஆவார். இவரும் பரிதாபாத்தில் உள்ள அல்பலா மருத்துவ பல்கலைக்கழகத்தில் டாக்டராக பணிபுரிந்துள்ளார்.

உமர் முகமது சம்பவ இடத்திலேயே பலியாகி இருப்பார், சிதைந்த உடல் இவருடையதாகத்தான் இருக்கும் என சந்தேகிக்கப்பட்டு டி. என்.ஏ. சோதனை செய்யப்படுகிறது.