அறமான கல்வி கற்பிக்க அறநிலையத்துறை பணம் செலவழிப்பதில் தவறில்லை...

மீண்டும் பாஜகவுடன் உறவு கொண்டுள்ள எடப்பாடி பழனிசாமி, அக்கட்சியின் இந்துத்துவ குரலில் பேசத் தொடங்கி விட்டார். அதில் ஒன்றுதான், "இந்து அறநிலையத்துறை பணத்தை எடுத்து கல்லூரிகள் கட்டுவது தவறு" என்ற அவருடைய பேச்சு. அதுவும் சாதாரணமாக குறை கூறவில்லை. அழுத்தம் திருத்தமாக ஆணித்தரமாக குற்றம் சாட்டியுள்ளார்.

- 

"கோவிலைக் கண்டாலே (தி.மு.கவுக்கு) கண்ணை உறுத்துகிறது. அதில் இருக்கும் பணத்தையெல்லாம் எடுத்து கல்லூரி கட்ட ஆரம்பிக்கிறார்கள். கோவிலைக் கட்டுவதற்காக உங்களைப் போன்ற நல்ல உள்ளம் படைத்தவர்கள் உண்டியலில் பணம் போடுகிறீர்கள். அது அறநிலையத் துறைக்குச் சேர்கிறது. எதற்காக உண்டியலில் பணம் போடுகிறீர்கள்? அந்தக் கோவிலை அபிவிருத்தி செய்ய. அந்தக் கோவிலை விரிவுபடுத்த. அந்தப் பணத்தை எடுத்து கல்லூரி கட்டுகிறார்கள். அரசாங்கத்தில் இருந்து கல்லூரி கட்டக்கூடாதா? நாங்கள் கொடுத்தோம் அல்லவா? அ.தி.மு.க. ஆட்சியில் இத்தனை கல்லூரியை கட்டிக்கொடுத்திருக்கிறோம். நீங்கள் அப்படியல்ல. வேண்டுமென்றே திட்டமிட்டு அறநிலையத் துறையில் இருக்கும் நிதியை எடுத்து இதற்கு செலவழிப்பது எந்த விதத்தில் நியாயம்? இதையெல்லாம் ஒரு சதிச்செயலாகத்தான் மக்கள் பார்க்கிறார்கள்" என்று கடுமையாக குற்றஞ்சாட்டினார்.