NAHULING ONLINE SCAMMERS, DATING MGA EMPLEYADO NG POGO

HABANG ang digital age na dapat sana'y nagbubukas ng mas maraming oportunidad, tila ito rin ngayon ang paboritong playground ng mga kriminal.

- NI RYAN B. SISON

Sa datos na inilabas ng Philippine National Police-Anti-Cybercrime Group (PNP-ACG), aabot na sa 5,099 ang naaresto mula Enero hanggang kalagitnaan ng Hunyo ngayong 2025 dahil sa mga online scam at maituturing na ring cybercrime cases.

Ang mas nakakabahala rito, karamihan sa kanila ay mga lalaking walang trabaho na nasa edad 20 hanggang 30 — panahong dapat ay nasa kasagsagan sila ng productivity o pagiging produktibo.

Lumalabas din sa report ng kapulisan na ilan sa mga nahuli ay dating empleyado ng Philippine Offshore Gaming Operator (POGO) na napilitang humanap ng bagong pagkakakitaan matapos ang total ban. Ang iba ay dating security guard na nagsagawa umano ng kanilang racket ng online scam.