Sugod na ang gubat sa politika sa dakbayan sa Sugbo

Wala pa gani moinit ang lingkoranan sa mga opisyal sa ilang paglingkod sa katungdanan, milusad naman dayon og opensiba si Bise Mayor Tomas Osmeña batok sa gisundan nga administrasyon ni kanhi Mayor Raymond Alvin Garcia sa iyang mga alegasyon mahitungod sa giingon niini nga pagpaburot sa presyo sa mga gipamalit o transaksyon sa Cebu City Hall.

- 

Apil usab sa gipasangil karon sa administrasyon ni Mayor Nestor Archival kang kanhi Mayor Garcia ang dos bilyones pesos nga budget deficit nga makaapekto gyud sa mga programa ilabi na sa mga nag unang galastohan lakip na ang pagsweldo sa mga kawani.

Unang gipabuto nga bomba ni Osmeña ang giingon niining suway nga pagpalit og sakynanan sa Garcia administration nga gipaburot og kapin sa usa ka milyones ka pesos ang presyo.

Apan gipadayag ni Garcia nga walay kwarta sa dakbayan nga nausik kay gipakanselar man niya ang transaksyon ug giuli na ang sakyanan kay nakita nila nga adunay discrepancy o dili mohaum sa lagda base usab sa legal opinion sa city legal maong wala nay angayan nga iisyu pa.

Ikaduhang bomba ang tshirt nga giingong tag P20,000 ang matag usa nga hilabihan ka dako ug duna matud pay gihuptan nga paper trail ang kampo ni Osmeña pagmatuod sa iyang expose.