కొండా మురళి చెబితేనే రోడ్డు వేశాం

• ప్రభుత్వ భూమిలో రోడ్డు వేసిన ఎంఐహెచ్ కంపెనీ డైరెక్టర్ మంద అశోక్ వెల్లడి • వరంగల్ జిల్లాలో ప్రభుత్వ భూమిని ఆక్రమించిన ఎంఐహెచ్ కంపెనీ

- 

• ఎంఐహెచ్ కంపెనీ డైరెక్టర్ అశోక్పై భూఆక్రమణల ఆరోపణలు

• ఆరోపణలు నిజమని నిర్ధారించిన ఎమ్మార్వో..

పోలీసులకు ఫిర్యాదు..

• తహశీల్దార్ ఫిర్యాదుపై విచారణ చేపట్టని అధికారులు, పోలీసులు

• పెద్దల హస్తం ఉండటంతోనే చర్యలకు వెనకాడుతున్నారని ..?

• కంపెనీ డైరెక్టర్ మంద అశోకైపై కఠిన చర్యలు తీసుకోవాలని స్థానికుల డిమాండ్

హైదరాబాద్, డిసెంబర్ 07 (ఆదాబ్ హైదారాబాద్) : అవినీతి పరులకు ప్రభుత్వ అధికారులు, పోలీసులు ఏవిధంగా కొమ్ము కాస్తున్నారో తెలిపే మరో సంఘటన తాజాగా వెలుగులోకొచ్చింది. వరంగల్ జిల్లాలో కోట్ల విలువైన ప్రభుత్వ భూమిని ఒక అక్రమార్కుడు ఆక్రమిస్తే అధికారులు చూస్తూ కూర్చున్నారు. ఈ భూకబ్జాపై తహశీల్దార్ పోలీసులకు ఫిర్యాదు చేసినా నిందితుడిపై ఎలాంటి చర్యలూ చేపట్టలేదు. పోలీసులు కూడా ఎఫ్ఎస్ఐఆర్ మాత్రమే నమోదు చేసి చేతులు దులుపుకున్నారు. సుమారు రూ.3 కోట్ల విలువైన దాదాపు 2000 గజాల ప్రభుత్వ భూమిని అక్రమంగా ఆక్రమించి రోడ్డు నిర్మాణం చేపట్టినా అధికార యంత్రాంగం నిమ్మకు నీరెత్తినట్లు నిర్లక్ష్యంగా వ్యవహరిస్తోంది.

నిందితుడు మంద అశోక్.. మంద ఐలయ్య కన్స్ట్రక్షన్ ప్రైవేట్ (ఎంఐహెచ్) లిమిటెడ్ కంపెనీ డైరెక్టర్. ఇతను ప్రభుత్వ భూమి లో ఇల్లీగల్గా రోడ్డు నిర్మాణం చేపట్టడంపై ఆదాబ్ హైదరా బాద్ ప్రతినిధి వివరణ కోరగా.. కొండా మురళి చెప్పిన తర్వాతే రోడ్డు వేశానని స్పష్టం చేయటం గమనార్హం. మంద అశోక్ చెప్పిన దాన్ని బట్టి చూస్తుంటే ఈ అక్రమ వ్యవహారంలో ప్రభుత్వ పెద్దల అండదండలు కూడా ఉన్నాయనే అనుమానం వ్యక్తమవుతోంది.