కెమికల్ ఫ్యాక్టరీలో...భారీ పేలుడు

పాశమైలారంలో దారుణ సంఘటన.. మంటలు చెలరేగి 12 మంది దుర్మరణం..!

- 

ప్రమాదంలో సంస్థ వైస్ ప్రెసిడెంట్ ఎల్ఎన్ గోవన్ దుర్మరణం

సహాయక చర్యలో నిమగ్నమైన అధికారులు..

క్షతగాత్రులకు వివిధ ఆస్పత్రుల్లో చికిత్స

ప్రమాదఘటనపై మంత్రుల సమీక్ష

తీవ్ర దిగ్భ్రాంతి వ్యక్తం చేసిన సిఎం రేవంత్..

క్షతగాత్రులకు మెరుగైన వైద్యం అందించాలని ఆదేశం..

సంగారెడ్డి, జూన్ 30 (ఆదాబ్ హైదరాబాద్): సంగారెడ్డి జిల్లా పటాన్చెరు సవిరీపంలోని పాశమైలారం పారిశ్రామిక వాడలో ఉన్న సీగాచి కెమికల్స్ పరిశ్రమలో సోమవారం ఉదయం ఘోర ప్రమాదం సంభవించింది. ఒక్కసారిగా రియాక్టర్ పేలిపోవడంతో భారీ ప్రమాదం సంభవించడంతో పరిశ్రమ అంతా చిన్నాభిన్నమై పోయింది.. ఈ ఘటనలో ఇప్పటివరకు 12 మంది ప్రాణాలు కోల్పోయినట్లు అధికార వర్గాలు వెల్లడించాయి.. ఉదయం 9 గంటల సమయంలో సీగాచి కెమికల్స్ లో పని సాగుతున్న సమయంలో రియాక్టర్ ఒక్కసారిగా పేలిపోవడంతో పెద్ద ఎత్తున మంటలు చెలరేగాయి. పేలుడు ధాటికి కంపెనీ షెడ్డు పూర్తిగా కూలిపోయింది. మంటలు తక్కువ సమయంలోనే పరిశ్రమ మొత్తం వ్యాపించడంతో కార్మికులు బయటకు పరుగులు పెట్టారు. అయినప్పటికీ, పలువురు కార్మికులు మంటల్లో చిక్కుకుపోయారు. ఈ ప్రమాదంలో 10 మంది ప్రాణాలు కోల్పోయారు. వారిలో ఐదుగురు కార్మికులు మంటల్లో సజీవదహనమయ్యారు. మిగతా మృతులు తీవ్ర గాయాల పాలై ప్రాణాలు కోల్పోయారు. శిథిలాల కింద ఇంకా 15 మంది కార్మికులు చిక్కుకుపోయి ఉండొచ్చని అనుమానించడంవల్ల మృతుల సంఖ్య మరింత పెరిగే ప్రమాదం కనిపిస్తోంది.గాయపడ్డ 38 మందిలో 20 మందిని చందానగర్ ప్రభుత్వాస్పత్రికి, మరో 18 మందిని ఇస్నాపూర్ లోని ప్రైవేట్ ఆసుపత్రికి తరలించారు. ప్రమాద సమాచారం అందుకున్న వెంటనే 8 ఫైరింజన్లు ఘటనాస్థలికి చేరుకొని మంటలను అదుపులోకి తేవడానికి తీవ్రంగా శ్రమించాయి..