యువతి ప్రాణం తీసిన తప్పటడుగు

ఒక క్షణం ప్రేమ మరో క్షణం భయం అంతలోనే జీవితం ముగింపు - ప్రేమ, భయం, పరువు మధ్య నలిగిపోయిన ఒక జీవితం|

- - డా. అట్ల శ్రీనివాస్ రెడ్డి

సంగారెడ్డి జిల్లా కొల్లూరు డబుల్ బెడ్రూం ఇండ్ల వద్ద చోటు చేసుకున్న యువతి మృతి చెందిన ఘటన ఒక వ్యక్తిగత విషాదం మాత్రమే కాదు. ఇది నేటి సమాజంలో యువత ఎదుర్కొంటున్న మానసిక ఒత్తిడి, భయం, సమస్యలెదురైనపుడు నిర్ణయం తీసుకోవడంలో కలిగే లోపంలను ప్రతిబింబించే అద్దంలాంటి యధార్థ సంఘటన.

ఒక క్షణం ప్రేమ మరో క్షణం భయం అంతలోనే జీవితం ముగింపు.

హైదరాబాద్ పాతబస్తీ కోమటివాడకు చెందిన యువతి (20), చార్మినార్ ప్రాంతానికి చెందిన యువకుని తో పరిచయం పెంచుకుంది. ఆ పరిచయం ప్రేమగా మారింది. ప్రేమలో ఉన్న ఇద్దరూ భవిష్యత్తు కలలు కంటున్న సమయంలోనే ఈ దారుణ ఘటన చోటు చేసుకుంది. ఖాళీ ప్లాట్లో గడిపిన క్షణాలు అనుకోని తండ్రి రాక అంతా ఒక్కసారిగా మారిపోయింది. తండ్రి ఎదురుపడితే ఏమవుతుందన్న భయం, పరువు పోతుందన్న ఆందోళన, ఆ క్షణంలో సరైన ఆలోచన చేయలేని మానసిక స్థితి ఇవన్నీ కలిసి యువతిని ఒక తప్పటడుగు వైపు నెట్టాయి. బాల్కనీ ద్వారా తప్పించుకునే ప్రయత్నం చివరకు ఆమె ప్రాణాలకే ముప్పుగా మారింది. ఈ సంఘటనను కేవలం అప్రమత్తత లోపం గా లేదా తప్పుడు నిర్ణయం గా చెప్పేసి ముందుకు వెళ్లిపోవడం మన బాధ్యతారాహిత్యం అవుతుంది. ఎందుకంటే ఇక్కడ అసలు ప్రశ్న, యువత ఎందుకు అంతగా భయపడుతోంది? ఎందుకు ఒక క్షణంలో ప్రాణాలకంటే పరువే పెద్దదిగా కనిపిస్తోంది?