ആഫ്രിക്കയുടെ ക്രിക്കറ്റ് മുന്നേറ്റം

കളിക്കളം

- എൻ.എസ്. വിജയകുമാർ

ക്രിക്കറ്റിന്റെ മെക്കയെന്നും അറിയപ്പെടുന്ന ലണ്ടനിലെ ലോഡ്സ് സ്റ്റേഡിയത്തിന്റെ ബാൽക്കണിയിൽ ടെംബ ബവുമ എന്ന നായകനൊപ്പം ദക്ഷിണാഫ്രിക്കൻ ക്രിക്കറ്റ് ടീം ടെസ്റ്റ് ചാംപ്യൻഷിപ്പ് ട്രോഫിയുമായി നിൽക്കുന്ന ചിത്രം ഇനി ഏറെക്കാലം ക്രിക്കറ്റ് ആരാധകരുടെ മനസ്സിൽ മായാതെ കിടക്കും. നന്നായി കളിച്ചിട്ടും, പ്രഗത്ഭരായ കളിക്കാരുടെ സാന്നദ്ധ്യമുണ്ടായിരുന്നിട്ടും ഐ.സി.സി കിരീട മത്സരങ്ങളിൽ അന്തിമ വിജയം ദക്ഷിണാഫ്രിക്കയെ കൈവിടാൻ തുടങ്ങിയിട്ട് വർഷങ്ങൾ ഇരുപത്തിയേഴാണ് കടന്നുപോയത്. ഒരു ഡസൻ തവണ സെമിയിലും, കഴിഞ്ഞ വർഷം ജൂണിൽ ഫൈനലിലും മികച്ച കളി കെട്ടഴിച്ചിട്ടും ദക്ഷിണാഫ്രിക്കൻ ക്രിക്കറ്റ് ടീമിന് കിരീട വിജയം കിട്ടാക്കനിയായി തുടരുക തന്നെയായിരുന്നു. ലോഡ്സ് ക്രിക്കറ്റ് മൈതാനത്ത് ജൂൺ പതിനൊന്നിന് 2023-25 ക്രിക്കറ്റ് സീസണിലെ ടെസ്റ്റ് ചാമ്പ്യൻഷിപ്പിന് ഓസ്ട്രേലിയയും ദക്ഷിണാഫ്രിക്കയും പൊരുതുവാൻ ഇറങ്ങുമ്പോൾ വിജയ സാദ്ധ്യതകൾ പാറ്റ് കമിൻസ് നയിച്ച കഴിഞ്ഞ ടെസ്റ്റ് ചാംപ്യൻഷിപ്പ് വിജയികളായിരുന്ന ഓസിസ് തന്നെയായിരുന്നു. എന്നാൽ ലോകമെമ്പാടുമുള്ള ക്രിക്കറ്റ് ആരാധകരുടെ മനസ്സിൽ ഇക്കുറിയെങ്കിലും ദക്ഷിണാഫ്രിക്ക ഒരു ഐ.സി.സി. കിരീട നേട്ടം സ്വന്തമാക്കണമെന്നു തന്നെയായിരുന്നു. അനിശ്ചിതത്വത്തിന്റെ കളിയെന്നു വിശേഷിപ്പിക്കപ്പെടുന്ന ക്രിക്കറ്റിൽ ദക്ഷിണാഫ്രിക്ക ആരാധകരെ നിരാശരാക്കിയില്ല. ഓസ്ട്രേലിയക്കെതിരെ അഞ്ചു വിക്കറ്റ് വിജയത്തോടെ ലോഡ്സിൽ നിന്നും ദക്ഷിണാഫ്രിക്കൻ ടീം ടെസ്റ്റ് ചാംപ്യൻഷിപ്പുമായി മടങ്ങുക തന്നെ ചെയ്തു.