കോമാക്കമ്മിറ്റി

കേരളം ഇന്നു ചിന്തിക്കുന്നതാവും ലോകം നാളെ പ്രവർത്തിക്കുന്നത്

- സുന്ദർജി

പണ്ടൊരിക്കൽ ബാബു പോൾ സരസമായി പറഞ്ഞിട്ടൊണ്ട് തലസ്ഥാനത്ത് മോണിംഗ് വാക്കിനിറങ്ങുമ്പോൾ അൽപം സൂക്ഷിക്കണം എന്ന്. കാരണം ഒരുപാട് കമ്മീഷനുകളും, കമ്മറ്റികളും ഒക്കെ നടക്കാനിറങ്ങും.

പ്രത്യേകിച്ച് ഈ കവടിയാർ ഭാഗത്ത്. ഇതിൽ പലരും ഹൈക്കോടതി റിട്ടയർ ചെയ്ത ജഡ്ജിമാരോ, ജസ്റ്റിസ്മാരോ ഒക്കെ ആയിരിക്കും എന്നു കൂട്ടിക്കോളിൻ. ഇവർ തമ്മിൽ കൂട്ടി ഇടിക്കാനും, തട്ടാനും, മുട്ടാനും ഒക്കെ സാദ്ധ്യത ഉണ്ടെന്ന്. വിവരാവകാശകമ്മീഷൻ നേരേ വരുമ്പോഴായിരിക്കും ഇടതു വശത്തുകൂടെ മനുഷ്യാവകാശ കമ്മീഷൻ ഓവർടേക്കു ചെയ്യുന്നത്. പെട്ടെന്നായിരിക്കും ഭരണപരിഷ്കാര കമ്മീഷൻ വലത്തോട്ടു തിരിയുന്നത്. കമ്മീഷനുകളുടെ ഇടയിൽ കൂടെ ലക്കും ലഗാനുമില്ലാത്ത ഇരുചക്രവാഹനങ്ങൾ പോലെ ചില കമ്മിറ്റികളും കേറിവരും (ഇനി ഇപ്പൊ ഇവ തമ്മിൽ എന്താ വ്യത്യാസം എന്നു ചോദിക്കരുത്. ഗൂഗിളിൽ പരതുക).

ഇവിടെ കുറേ നാളായിട്ട് ഖാദർ കമ്മിറ്റിയാണ് പരപരാ വെളുക്കുമ്പം നടന്നോണ്ടിരുന്നത്. പെട്ടെന്നൊരു ദിവസം ഹേമാക്കമ്മിറ്റി ഓവർടേക്കു ചെയ്തിങ്ങു കേറി. പിന്നെ തിരിഞ്ഞു നോക്കീട്ടില്ല. ഹൈ സ്പീഡിലൊരു പോക്കാന്നേ. വഴിവക്കിൽ ഇങ്ങനേം ചിലതു കേൾക്കുന്നുണ്ടേ!