રિવેન્જ પોર્નઃ આ માનસિક વિકૃતિથી દૂર રહેજો...

કોઈની સામે બદલો લેવા એની અંગત ક્ષણોના પુરાવા જાહેર કરવામાં કોઈ બહાદુરી નથી!

- ડૉ. મિતાલી સમોવા

માણસ આજીવન અંગત અને સામાજિક જીવન વચ્ચે મર્યાદાપૂર્વ જીવવાનો પ્રયત્ન કરતો હોય છે. માણસના જીવનમાં ત્રણ વર્તુળ હોય છેઃ વ્યક્તિગત, પારિવારિક અને સામાજિક. વ્યક્તિગત વર્તુળમાં એની અંગત શારીરિક-માનસિક-ભાવનાત્મક બાબત જીવનસાથી (કે પાર્ટનર) સાથેનો વ્યવહાર ગણાય. સામાન્ય રીતે વ્યક્તિ સૌથી વધુ નિર્બળ વ્યક્તિગત વર્તુળમાં હોય છે, જ્યાં એ પોતાની જાતને સંપૂર્ણ રીતે નિઃશસ્ત્ર-નિર્વસ્ત્ર કરીને જેવી હોય તેવી વર્તતી હોય છે. કોઈ વ્યક્તિને એના પ્રેમીપાત્ર (અથવા તો જીવનસાથી) જેટલી સારી (કે ખરાબ) રીતે ઓળખતું હોય તેટલું બીજું કોઈ ઓળખી ન શકે.

જો કે જ્યાં સુધી પારિવારિક કે સામાજિક વર્તનની વાત છે, એમાં સરેરાશ માણસ દંભ તથા મર્યાદા સાથે જીવતા હોય છે. એ સામાજિક જીવન માટે અત્યંત જરૂરી પણ છે, પરંતુ જો કોઈ તમારા અંગત કે વ્યક્તિગત વર્તુળમાં રહેલી ભરોસામંદ વ્યક્તિ જ તમારી સાથે છળ કરીને તમારી પ્રાઈવેટ લાઈફને પબ્લિક કરી દે તો?