સંસદસભ્યો પાસેથી પ્રજા શું અપેક્ષા રાખી શકે?

રાહુલ ગાંધીની લોકસભાની સદસ્યતા રદ કરતા ચુકાદાનો અમલ અટકાવતી વખતે સર્વોચ્ચ અદાલતે નોંધ્યું કે જાહેર જીવનમાં હોય એ વ્યક્તિએ વાણી પર સંયમ રાખવો. આપણા જનપ્રતિનિધિઓએ આવું તો ઘણું કરવાની જરૂર છે.

- હીરેન મહેતા

કોર્ટના ચુકાદા પછી રાહુલ ગાંધીનો સંસદમાં પુનઃ પ્રવેશ.

સાડા ચાર મહિનાના અંતરાલ પછી રાહુલ ગાંધી સંસદમાં પાછા ફર્યા છે. મોદી અટકના ઉલ્લેખ દ્વારા એમણે વડા પ્રધાન નરેન્દ્ર મોદીની સરખામણી લલિત મોદી અને નીરવ મોદી જેવા ભાગેડુ આરોપીઓ સાથે કરી હતી. ગયા ફેબ્રુઆરીમાં સુરતની એક અદાલતે એમને એ માટે દોષિત ઠેરવી બદનક્ષીના ગુનામાં અપાતી મહત્તમ (બે વર્ષની) સજા ફરમાવી હતી. ગુજરાત વડી અદાલતે એ ચુકાદો બહાલ રાખ્યો હતો. જો કે સર્વોચ્ચ અદાલતે એ ચુકાદાનો અમલ સ્થગિત કર્યો છે. સુપ્રીમ કોર્ટે નોંધ્યું છે કે સુરત અદાલતનો ફેંસલો . બહુ લાંબો છે, પણ એમાં રાહુલ ગાંધીને બે વર્ષની સજા આપવા માટે કોઈ નક્કર કારણ ટાંકવામાં આવ્યું નથી.