તાપીના જંગલને આ રીતે લાગશે તાળું!

જંગલ ફરતે દીવાલ અને વરસાદી પાણી રોકવાના ખાડા જેવાં કામ થવાથી વ્યારા વિભાગના રેન્જ ફોરેસ્ટ ઑફિસર આર.આઈ. કોસાડા કહે છે એમ, એક તીરે બે નિશાન સાધી શકાશે.

- 

કોઈ આના મોં પર તાળું મારો.. બેફામ વાણીવિલાસ કરતા લોકો માટે આવા શબ્દો ઘણી વાર સાંભળવા મળે, પણ ખરેખર મોં પર તાળું લાગે ખરું? ખેર છોડો, એક કામ કરીએ. જંગલની જમીનમાં ગેરકાયદે ખેડાણ કે જમીન પચાવી પાડવાની અવારનવાર બનતી ઘટના રોકવા ચાલો, જંગલને જ તાળું મારી દઈએ!

તમે કહેશો, આ વળી કેવી રીતે બને? જેમ મોં પર તાળું લાગે એવી જ રીતે બને અને તાપીનાં જંગલોમાં તાળાં લાગી પણ રહ્યાં છે. વિશ્વાસ ન આવે તો તમે ખુદ જ જોઈ લો..

તાપી જિલ્લામાં ૯૪,૦૦૦ હેક્ટરમાં જંગલ પથરાયેલાં છે, જેમાં વ્યારા રેન્જમાં ૧૧,૭૦૦ હેક્ટરમાં જંગલ છે. આ જંગલવિસ્તારની મોટી સમસ્યાઓમાં જોઈએ તો જંગલમાં ગેરકાયદે પ્રવેશ, ખેડાણ, કટિંગ અને ચરિયાણ તેમ જ આ બધા સાથે કોઈ નક્કર સરહદ ન હોવાને કારણે જંગલની જમીન પચાવી પાડવાના પણ પેંતરા રચાય છે. વિશાળ જંગલમાં આ બધી પ્રવૃત્તિ પર નિયંત્રણ રાખવું વન વિભાગ માટે ઘણું મુશ્કેલ હતું. એને પરિણામે ઘણી વખત સ્થાનિક લોકો અને જંગલખાતાના કર્મચારીઓ વચ્ચે ઘર્ષણ પણ થયું છે.

આ બધી પ્રવૃત્તિ પર છેલ્લાં બે વર્ષથી જાણે પ્રતિબંધ આવી ગયો છે અને એનું કારણ એ છે કે જંગલને લૉક કરાઈ રહ્યું છે. ફરી નવાઈ લાગી ને? ચાલો, વિગતવાર જાણીએ.