બાંગ્લાદેશની જ્વાળાઓ આપણાં ઈશાની રાજ્યોને દઝાડશે?

શેખ હસીના પ્રાઇમ મિનિસ્ટર બની એ પછી, ૩૦ જાન્યુઆરી, ૨૦૧૪ના રોજ આ ષડયંત્રમાં સામેલ ૧૪ અપરાધીઓ, આતંકવાદી ઓને મૃત્યુદંડની સજા સંભળાવવામાં આવેલી.

- સ્પર્શ હાર્દિક

૧ એપ્રિલ ૨૦૦૪ની રાત્રે બાંગ્લાદેશ પોલીસ અને કોસ્ટ ગાર્ડે રાઇફલ, રૉકેટ લૉન્ચર, પિસ્તોલ, ગ્રેનેડ, કારતૂસ, વગેરે જેવા ચીની બનાવટનાં ઘાતક હથિયારોનો વિશાળ જથ્થો ભરેલા દસ ટ્રક ભારતનાં ઇશાન રાજ્યોમાં અલગતાવાદી સંગઠનો સુધી પહોંચે એ પહેલાં પકડી પાડેલા. ખાલિદા ઝિયા ત્યારે બાંગ્લાદેશની પ્રાઇમ મિનિસ્ટર હતી, એટલે હથિયારો પકડાય એ માટે ભારતે ઘણું દબાણ કરવું પડેલું. શેખ હસીના પ્રાઇમ મિનિસ્ટર બની એ પછી, ૩૦ જાન્યુઆરી, ૨૦૧૪ના રોજ આ ષડયંત્રમાં સામેલ ૧૪ અપરાધીઓ, આતંકવાદી ઓને મૃત્યુદંડની સજા સંભળાવવામાં આવેલી. એ યાદીમાં એક નામ હતું પરેશ બરુઆ.

૧૯૭૯માં પેદા થયેલા અલગતાવાદી સંગઠન ‘યુનાઇટેડ લિબરેશન ફ્રન્ટ ઑફ આસામ ’(ULFA)ના સહ-સ્થાપક પરેશ બઆની ગેરહાજરીમાં એ કેસ ચાલેલો અને કહે છે કે બરુઆ ચીનના યુનાન પ્રાંતમાં અથવા બર્મા-ચીન સરહદે ક્યાંક સંતાઈને પડ્યો છે. બાંગ્લાદેશમાં તખ્તા પલટની ઘટના બાદ ચીફ ઍડવાઇઝર નેલો, શાંતિના નોબેલથી પુરસ્કૃત પરંતુ હરકતો અને બયાનોથી અશાંતિદૂત સાબિત થયેલો મુહમ્મદ યુનુસ ત્યાંના કટ્ટરપંથી અને ભારત વિરોધી તત્ત્વો પ્રત્યે શરૂઆતથી જ માયાળુ રહ્યો છે, એટલે અન્યોની સાથે પરેશ બઆની સજા પણ ઘટાડીને ઉંમરકેદ કરી દેવાયેલી. અફવા એવી છે કે પાકિસ્તાની ISI બરુઆને હવે ઢાકામાં સેટલ કરાવવાની છે. આ એનો સંકેત છે કે બાંગ્લાદેશને જિહાદની નવી ફૅક્ટરી બનાવીને પાકિસ્તાન આપણાં ઇશાન રાજ્યોને ફરીથી હિંસાની આગમાં સળગાવવાની ફિરાકમાં છે.

પાકિસ્તાનમાં સીધી રીતે જંગ ખેલવાની હેસિયત રહી નથી એટલે ‘બ્લીડ ઇન્ડિયા વિથ એ થાઉઝન્ડ કટ્સ’ યાને ભારત માતાના દેહને હજાર જખમ આપીને રક્ત વહેવડાવું, એવી હેવાનિયતનો નવો કાર્યક્રમ યુનુસ મિયાંની અગવાઈમાં બાંગ્લાદેશની ધરતી પરથી ક્યારનો શરૂ થઈ ગયો છે. જીઓપૉલિટિક્સના જાણકારોનું માનવું છે કે, અમેરિકાની વિદેશનીતિ કહો અથવા ડિપ સ્ટેટની ચાલ કહો, એ મુજબ ભારતની પડોશમાં રાજકીય અસ્થિરતા અને અરાજકતા ટકાવી રાખવાના મકસદ સાથે પણ આ કાર્યક્રમ સુસંગત છે. એની ફલશ્રુતિ રૂપે ભારતને સતત સંઘર્ષમાં વ્યસ્ત રાખીને આર્થિક વૃદ્ધિની ગતિ ધીમી પાડી શકાય.