સમાજ

ઓટીટી ક્રાઇમ અને સસ્પેન્સ થ્રિલર્સઃ કેવા છે માનસિક પ્રભાવ અને સામાજિક પડકારો?

- હિમાદ્રી આચાર્ય દવે

ઓવર-ધ-ટૉપ (ઓટીટી) પ્લૅટફૉર્મ્સ આધુનિક મનોરંજનના ક્ષેત્રમાં ક્રાંતિ લાવી નવો યુગ શરૂ કર્યો છે. કોવિડ-૧૯ મહામારીએ આ પ્લૅટફૉર્મ્સની લોકપ્રિયતાને વધુ વેગ આપ્યો. આ દરમિયાન, જ્યારે સિનેમાઘરો અને અન્ય મનોરંજનના સ્ત્રોતો બંધ હતા, ઓટીટી પ્લૅટફૉમ્સે લોકોને ઘરે બેસીને મનોરંજનનો એક શ્રેષ્ઠ વિકલ્પ પૂરો પાડ્યો. મહામારીની શરૂઆતથી ઓટીટી પ્લૅટફૉર્મ્સની માંગમાં અસાધારણ વધારો થયો, જેમાં સબસ્ક્રિપ્શન અને દર્શક સંખ્યા અદ્ભુત રીતે વધી. આ પ્લૅટફૉર્મ્સ ઇન્ટરનેટ દ્વારા વીડિયો સામગ્રીનું વિતરણ કરે છે, જેમાં કેબલ અથવા સેટેલાઇટ ટીવીની જરૂર નથી. નેટફ્લિક્સ, એમેઝોન પ્રાઇમ વીડિયો, ડિઝની+ અને ભારતીય પ્લૅટફૉર્મ્સ જેવા કે હોટસ્ટાર અને ઝીપએ માત્ર મનોરંજનનું માધ્યમ જ નહીં, પરંતુ સમાજની મનોવૈજ્ઞાનિક અને સામાજિક ગતિશીલતાને પણ બદલી નાખી છે. આ પ્લૅટફૉર્મ્સ ગ્રાહકોની માંગ પર સામગ્રી પૂરી પાડીને, વૈવિધ્યસભર શૈલીઓ અને ભાષા ઓમાં ફિલ્મો, વેબ સિરીઝ અને ડૉક્યુમેન્ટરીઓની ઍક્સેસ આપી છે. વળી, જ્યારે જે જોવું હોય એ જોવાની સગવડ તેમ જ અગાઉની જેમ સિરીઝના એક-એક એપિસોડની રાહ જોવી ન પડતી હોવાને કારણે તે વધુ લોકભોગ્ય અને લોકપ્રિય બને છે. એમાંય, ક્રાઇમ થ્રિલર, સિરિયલ કિલર આધારિત શ્રેણીઓ અને સસ્પેન્સથી ભરપૂર સામગ્રીએ વૈશ્વિક સ્તરે અસાધારણ લોકપ્રિયતા મેળવી છે. ભારતમાં ડેલ્હી ક્રાઇમ' અને ‘પાતાલ લોક' જેવી શ્રેણીઓએ સામાજિક વાસ્તવિકતાઓ સાથે ક્રાઇમનું ઘાટું ચિત્રણ કર્યું છે. ઉપરાંત સેક્રેડ ગેમ્સ, ધ ફૅમિલી મેન, અસુર: વેલકમ ટુ યોર ડાર્ક સાઇડ, મિર્ઝાપુર, સ્પેશિયલ ઓપીએસ, ક્રિમિનલ જસ્ટિસ અને આંતરરાષ્ટ્રીય શ્રેણીઓ જેવી કે ‘Mindhunter’ અને ‘You’ જેવી સિરીઝ યુવાનો અને પુખ્ત વયના દર્શકોમાં ખૂબ જ લોકપ્રિય બની છે. જ્યારે ‘Mindhunter' અને ‘Dexter' જેવી આંતરરાષ્ટ્રીય શ્રેણીઓએ સિરિયલ કિલર્સના મનોવિજ્ઞાનને ઊંડાણપૂર્વક રજૂ કર્યું છે.