વામા-વિશ્વ ગાર્ડનિંગ

મીઠા લીમડા, કોથમીર અને કારેલાં જેવા છોડ માટે કેવાં કૂંડાં પસંદ કરવાં?

- હેતલ ભટ્ટ

અષાઢી બીજ આડે હવે ગણતરીના દિવસો બાકી છે. વરસાદની ઋતુની ઓફિશિયલ શરૂઆત થશે એ દિવસોથી. ગાર્ડનિંગના શોખીનો માટે મનગમતી ૠતુ એટલે ચોમાસું, કારણ કે આ ૠતુમાં કોઈ પણ વૃક્ષ, ફૂલછોડ ખૂબ સરળતાથી અને ઝડપથી ઊગતા હોય છે. પૂરતા પ્રમાણમાં પાણી અને સૂર્યપ્રકાશ મળી રહે એટલે ફૂલછોડનો વિકાસ પણ યોગ્ય રીતે થાય છે. જેઓ અગાઉથી ગાર્ડનિંગ સાથે જોડાયેલા હશે તેમને તો ખ્યાલ હશે જ, પરંતુ જેમના માટે ગાર્ડનિંગ નવું નવું છે અથવા જેઓ પહેલીવાર પોતાના ઘરમાં બગીચા કે કિચન ગાર્ડન તૈયાર કરવાની શરૂઆત કરી રહ્યા છે, તેમના માટે જૂન મહિનાનો મધ્ય ભાગ ગાર્ડનિંગની શરૂઆત માટે યોગ્ય છે. ચોમાસામાં જે ફૂલછોડ ઉગાડવા હોય તેની પ્રિ-પ્રિપરેશન આ સમયગાળાથી કરવાની રહે છે. યોગ્ય આકારનાં કૂંડાં, યોગ્ય કદનાં કૂંડાં, માટી-રેતી, બીજ, રોપા, ખાતર, જીવાત ન લાગે તે માટેની કાળજી વગેરે બાબતો ગાર્ડનિંગ સાથે જોડાયેલી છે. આ ઉપરાંત બગીચામાં ઊગી આવતું નીંદામણ પણ અલગ કરવાનું કામ કરવું પડે છે, જેથી તેની અસર ફૂલછોડના વિકાસ પર ન પડે.