સંસદનું વિશેષ સત્ર યોજવાથી સરકાર કેમ ભાગે છે?

વાજપેયીએ યુદ્ધ દરમિયાન વિક્ષના નેતાઓને વિશ્વાસમાં લીધા હતા, તેમ જ સંસદનું વિશેષ સત્ર પણ યોજ્યું હતું. અત્યાર સુધી વિપક્ષોની જે માગણી બહુ યોગ્ય જણાતી નહોતી તે હવે વાજબી હોવાનું અનુભવાઈ રહ્યું છે

- ચાણક્ય

ઑપરેશન સિંદૂરના ઘટનાક્રમ પછી વિરોધપક્ષો ખાસ કરીને કોંગ્રેસ સંસદનું વિશેષ સત્ર બોલાવવાની માગણી કરતી હતી. શાસક પક્ષના ગઠબંધન એનડીએ અને નરેન્દ્ર મોદીની સરકારે આવી માગણીની ઉપેક્ષા કરી હતી. કોંગ્રેસ અને અન્ય કેટલાક પક્ષો દ્વારા સમયાંતરે ઑપરેશન સિંદૂરના ઘટનાક્રમ અંગે સરકાર સામે પ્રશ્નો ઉઠાવવાનું શરૂ કર્યું. એ વખતે માહોલ એવો હતો કે વિપક્ષોના પ્રશ્નોને કારણે લોકોમાં વિપક્ષની છાપ ખરાબ થતી હતી. સરકારે ખાસ કરીને ભારતના સૈન્યએ ઑપરેશન સિંદૂર અને તે પછીના પ્રતિકારનાં પગલાં દ્વારા પાકિસ્તાનને જે ફટકો માર્યો તેના કારણે લોકોના જુસ્સામાં વધારો થયો હતો અને જનજુવાળ સરકારના સમર્થનમાં પ્રવાહિત થઈ રહ્યો હતો. એવા સમયે વિપક્ષોના પ્રશ્નો સૈન્યની કાર્યવાહી અને સરકારની નિષ્ઠા સામે શંકા ઉત્પન્ન કરનારા હતા. લોકોમાં એવી ઇમેજ સર્જાઈ હતી કે વિપક્ષ પાકિસ્તાનની ભાષા બોલે છે. રાહુલ ગાંધી અને કોંગ્રેસના અન્ય નેતાઓએ ઑપરેશન સિંદૂરમાં ભારતને કેટલું નુકસાન થયું અને ભારતનાં કેટલાં વિમાનો પાકિસ્તાને તોડી પાડ્યાં તેની વિગતો સરકાર પાસેથી માગવામાં આવી રહી હતી.

આ ઘટનાક્રમમાં સ્થિતિ એવી હતી કે પાકિસ્તાન સરકાર અને પાકિસ્તાનને સૈન્યના વડા દ્વારા ભારતનાં વિમાનો તોડી પાડવામાં આવ્યા હોવાનો દાવો કરવામાં આવ્યો હતો. તેને કારણે આ જ પ્રકારના કોંગ્રેસના સવાલો સામે લોકો શંકા વ્યક્ત કરતા હતા. જોકે સંસદનું વિશેષ સત્ર બોલાવવાની માગણી સાવ અયોગ્ય નહોતી. ભૂતકાળમાં આવા સંજોગોમાં સંસદનું વિશેષ સત્ર બોલાવાયું છે અને તેમાં પાકિસ્તાન સામેની સૈન્ય કાર્યવાહીની તેમ જ યુદ્ધમાં થયેલા નુકસાનની તમામ વિગત સરકાર દ્વારા સંસદમાં રજૂ થતી રહી છે. ભારતે પાકિસ્તાન સામે છેલ્લે કારગિલનું યુદ્ધ લડ્યું હતું. એ સમયે કેન્દ્રમાં અટલબિહારી વાજપેયીની સરકાર હતી. વાજપેયીએ યુદ્ધ દરમિયાન વિક્ષના નેતાઓને વિશ્વાસમાં લીધા હતા, તેમ જ સંસદનું વિશેષ સત્ર પણ યોજ્યું હતું. અત્યાર સુધી વિપક્ષોની જે માગણી બહુ યોગ્ય જણાતી નહોતી તે હવે વાજબી હોવાનું અનુભવાઈ રહ્યું છે.