നിക്ഷേപകർക്കു കുതിക്കാം ഇൻഫ്രാസ്ട്രക്ചറിലൂടെ

"അമേരിക്കയ്ക്കു പണമുള്ളതു കൊണ്ടല്ല അമേരിക്കയുടെ റോഡുകൾ മികച്ചതായത്. അമേരിക്ക സമ്പന്ന രാഷ്ട്രമായതു തന്നെ അവിടെ മികച്ച റോഡുകളുള്ളതിനാലാണ്.' -ജോൺ എഫ്. കെന്നഡി, മുൻ അമേരിക്കൻ പ്രസിഡന്റ്.

- 

"അമേരിക്കയ്ക്കു പണമുള്ളതു കൊണ്ടല്ല അമേരിക്കയുടെ റോഡുകൾ മികച്ചതായത്. അമേരിക്ക സമ്പന്ന രാഷ്ട്രമായതു തന്നെ അവിടെ മികച്ച റോഡുകളുള്ളതിനാലാണ്.' -ജോൺ എഫ്. കെന്നഡി, മുൻ അമേരിക്കൻ പ്രസിഡന്റ്.

കേന്ദ്രമന്ത്രി (റോഡ്, ഹൈവേ) നിതിൻ ഗഡ്കരി എവിടെ റോഡ് ഉദ്ഘാടനത്തിനുപോയാലും കെന്നഡിയുടെ ഈ വാക്കുകൾ ഉദ്ധരിക്കും. ഇത് അടിസ്ഥാന പ്രമാണമായി എടുത്തുള്ള ഒരു പരിശ്രമം തന്റെ ഭാഗത്തു നിന്നുണ്ടാകുന്നുവെന്നാണ് അദ്ദേഹം പറയാറുള്ളത്.

നമ്മൾ കേരളത്തിലിരുന്ന് ഇന്ത്യയുടെ സാമ്പത്തികാവസ്ഥയും പൊതു ചിത്രവും വിലയിരുത്തുമ്പോൾ പിടി തരാതെ കിടക്കുന്ന ഒരു മേഖലയാണ് രാജ്യത്തെ അടിസ്ഥാന സൗകര്യവികസനം. എന്നാൽ സാമ്പത്തിക രംഗത്തു പ്രവർത്തിക്കുന്ന മാധ്യമങ്ങളിൽ നിന്നു മനസ്സിലാക്കാനാവുന്നത് രാജ്യത്ത് ഈ സെക്ടറിൽ ചെറിയ പണിയൊന്നുമല്ല നടക്കുന്നതെന്നാണ്. ലോകത്തിലെ ഏറ്റവും വലിയ മൂന്നാമത്തെ സാമ്പത്തികശക്തിയാവാൻ തയാറെടുക്കുന്ന ഭാരതത്തെ സംബന്ധിച്ച് അടിസ്ഥാന സൗകര്യവികസനം വിധിനിർണായകമാണ്. ഉത്തർപ്രദേശ്, മഹാരാഷ്ട്ര, ഗുജറാത്ത്, രാജസ്ഥാൻ, തമിഴ്നാട്, ആന്ധ്ര സംസ്ഥാനങ്ങളിൽ ഈ സെക്ടറിൽ നടക്കുന്നതു സമാനതകളില്ലാത്ത കുതിപ്പാണ്.

ഗഡ്കരി തന്നെ പറയുന്നതു രാജസ്ഥാനിലെ പ്രധാന റോഡുകളെല്ലാം അമേരിക്കയ്ക്കൊപ്പം നിൽക്കുന്നവയാണെന്നാണ്. രാജ്യത്ത് ഇഴഞ്ഞു നീങ്ങിയിരുന്ന പാത നിർമാണങ്ങൾ ഇനി പഴങ്കഥ. കാലത്തിനനുസരിച്ചുള്ള ടെക്നോളജിയുടെ മാറ്റം കൂടി ഉൾക്കൊണ്ടപ്പോൾ ദേശീയപാത നിർമാണം പ്രതിദിനം ശരാശരി 29 കിമീയായി മുന്നേറി.